රුපි­යල් මිලි­යන 1650කට අධික වටි­නා­ක­ම­කින් යුත් හෙරො­යින් මත්ද්‍රව්‍ය කිලෝ 66 යි ග්‍රෑම් 840 ක තොග­යක් රැගත් බහු­දින ධීවර යාත්‍රා­වක් ගැඹුරු මුහුදේ දී නාවික හමුදා භාර­යට ගෙන තිබේ.

ශ්‍රී ලංකා නාවික හමු­දාව, ශ්‍රී ලංකා­වට බට­හිර දෙසින් ගැඹුරු මුහුදේ ශ්‍රී ලංකා නාවික නෞකා සුර­නි­මල නෞකාව යොදවා සිදු­කළ විශේෂ සෝදිසි මෙහෙ­යු­මක් මඟින්, මත්ද්‍රව්‍ය ප්‍රවා­හ­නය කර­මින් තිබූ බවට සැකකෙරෙන මෙරට බහු­දින ධීවර යාත්‍රා­වක් සමඟ සැක­ක­රු­වන් හයදෙනෙකු (06) නාවික හමුදා භාර­යට ගැනී­මට කට­යුතු කෙරුණු අතර, එම ධීවර යාත්‍රාව ගාල්ල වරාය‍ට රැගෙ­න­විත් සිදු කළ වැඩි­දුර පරි­ක්‍ෂා­වේදී, උර හයක් තුළ (06) පාර්සල් හැටක (60) අසුරා තිබූ රුපි­යල් මිලි­යන 1650 කට අධික වටි­නා­ක­ම­කින් යුත් හෙරො­යින් මත්ද්‍රව්‍ය කිලෝ 66 යි ග්‍රෑම් 840 ක පමණ තොග­යක් අත්අ­ඩං­ගු­වට ගැනී­මට කට­යුතු කෙරිණි.

නාවික හමු­දා­පති වයිස් අද්මි­රාල් ප්‍රියන්ත පෙරේරා, එම මත්ද්‍රව්‍ය තොගය නිරී­ක්‍ෂ­ණය කිරීම ඊයේ (15) ගාල්ල වරා­යේදී සිදුකෙරිණි.

නාවික හමු­දාව ධීවර යාත්‍රාවේ සිදු කළ වැඩි­දුර පරි­ක්‍ෂා­වේදී, එම ධීවර යාත්‍රාවේ උර හයක් තුළ (06) පාර්සල් 60 ක අසුරා තිබූ හෙරො­යින් මත්ද්‍රව්‍ය කිලෝ 66 යි ග්‍රෑම් 840ක තොග­යක් මෙලෙස අත්අ­ඩං­ගු­වට ගෙන තිබේ. එම මත්ද්‍රව්‍ය තොගයේ දළ වීථි වටි­නා­කම රුපි­යල් මිලි­යන 1650කට අධික වෙතැයි විශ්වාස කෙරේ.

මෙම මෙහෙ­යුම මඟින් අත්අ­ඩං­ගු­වට ගත් සැක­රු­වන් වයස අවු­රුදු 18ත් 34ත් අත‍ර වන මිරිස්ස ප්‍රදේ­ශයේ පදිං­චි­ක­රු­වන් බවට හඳුනාගෙන ඇත.

අත්අ­ඩං­ගු­වට ගත් හෙරො­යින් මත්ද්‍රව්‍ය තොගය, සැක­ක­රු­වන් හය­දෙනා (06) සහ බහු­දින ධීවර යාත්‍රාව (01) ඉදිරි නීති­මය කට­යුතු සඳහා පොලිස් මත්ද්‍රව්‍ය නාශක කාර්යං­ශය වෙත භාර­දී­මට නිය­මි­තව ඇති බව නාවික හමු­දාව පව­සයි.