ශ්‍රී ලංකාව බලා යාත්‍රා කරමින් සිටියදී බැල්ටිමෝර් ෆ්‍රැන්සිස් ස්කොට් කී පාලමේ ගැටුණු ඩාලි නම් භාණ්ඩ ප්‍රවාහන නෞකාවේ සිටින ශ්‍රී ලංකාවේ සහ ඉන්දියාවේ කාර්ය මණ්ඩල සාමාජිකයන් නැවත සිය මව් රටවලට පැමිණීම වැළැක්වීමට එක්සත් ජනපද නීතිවේදීන් උත්සාහ කරමින් සිටින බව වාර්තා වේ.

සිදුවීමට අදාළ නඩු කටයුතු මෙම සතියේ යළි කැඳවීමට නියමිතය.

ඒ වෙනුවෙන් අධිකරණය හමුවේ ගොනු කර ඇති ඊමේල්වලට අනුව කාර්ය මණ්ඩල සාමාජිකයන් අතරින් අට දෙනෙකු ජුනි 20 වැනි දිනට පෙර ඔවුන්ගේ නිවාස වෙත යෑමට නියමිතව තිබී ඇත.

නෞකා කාර්යමණ්ඩලයේ සේවකයන් අතරින් 20කට වැඩි පිරිසක් ඉන්දියානුවන් සහ ශ්‍රී ලාංකිකයන් බව පැවසේ.

බැල්ටිමෝර් නගරය නියෝජනය කරන නීතීඥයන් අධිකරණය හමුවේ ගොනුකළ ලේඛන මගින් පවසා ඇත්තේ පාලම කඩා වැටීමේ හානි පියවීමට වගකිව යුත්තේ කවුරුන්ද යන්න පිළිබඳ ප්‍රශ්න කළ හැකි වන පරිදි නෞකාවේ සිටින පිරිස එක්සත් ජනපදයේ රැඳී සිටිය යුතු බවයි.

කාර්ය මණ්ඩලය සම්පූර්ණයෙන්ම විදේශීය ජාතිකයන් බවත් අනතුරට තුඩු දෙන සිදුවීම් පිළිබඳ විවේචනාත්මක තොරතුරු පවතින බවත් නීතිඥවරුන් අධිකරණය හමුවේ ගොනුකළ ලේඛනවල සඳහන් කර තිබේ.

කාර්ය මණ්ඩලයට එක්සත් ජනපදයෙන් පිටවීමට අවසර දුනහොත් වන්දි අයකර ගැනීම සම්බන්ධයෙන් ප්‍රශ්න කිරීමට අවස්ථාවක් නොලැබෙනු ඇති බව ද නීතිඥයන් පෙන්වා දී ඇත.

කෙසේවෙතත් අධිකරණය ඒ සම්බන්ධයෙන් මෙතෙක් ප්‍රතිචාර දක්වා නොමැති බව වාර්තා වේ.

නෞකාවේ හිමිකරුගේ ප්‍රකාශකයකු සඳහන් කර ඇත්තේ කාර්ය මණ්ඩල සාමාජිකයන් කොපමණ ප්‍රමාණයක් පිටව යන්නේ සහ ඒ කවදාද යන්න නිශ්චිතව ප්‍රකාශ කළ නොහැකි බවයි.

නෞකාවේ හිමිකරු සහ කළමනාකරු මේ වන විටත් අධිකරණය හමුවේ පෙත්සම් ගොනු කර ඇත්තේ මෙම අතතුරට ඔවුන්ගේ නීතිමය වගකීම සීමා කරන ලෙස ඉල්ලමිනි.

ඉකුත් මාර්තු මස 26 වැනිදා සිදු වූ අනතුර සම්බන්ධයෙන් එක්සත් ජනපද FBI ආයතනය ද අපරාධ විමර්ශනයක් ද ආරම්භ කර තිබේ.

නිවසට පැමිණීමට නියමිත කාර්ය මණ්ඩල සාමාජිකයන් අට දෙනා සමඟ විමර්ශකයන් දැනටමත් සාකච්ඡා කර ඇති අතර ඔවුන් නෞකාවෙන් පිටත්ව යෑම සම්බන්ධයෙන් කිසිදු විරුද්ධත්වයක් දක්වා නොමැති බව වාර්තා වේ.