June 20, 2024
මෙරට සංචාරයක නිරත ඉන්දීය විදේශ කටයුතු ඇමැති එස්.ජයිශංකර් සමඟ රජය ගෙන යන සාකච්ඡා විනිවිදභාවයකින් යුතුව කරන ලෙස ජාතික නිදහස් පෙරමුණේ නායක පාර්ලිමේන්තු මන්ත්‍රී විමල් වීරවංශ ඉල්ලයි.
පාර්ලිමේන්තුව අමතමින් වීරවංශ මන්ත්‍රීවරයා කියා සිටියේ ජයිශංකර්ගේ සංචාරයේදී අවම වශයෙන් ව්‍යාපෘති 10 -12ක් සඳහා එකඟතාවකට පැමිණීමට අපේක්ෂා කරන බවයි.
“ඉන්දීය විදේශ ඇමැති ජයිශංකර්ගේ සංචාරය පිළිබඳ සභානායකවරයාගේ අවධානය යොමු කරන ලෙස මම ඉල්ලා සිටීමට කැමතියි. අපට ලැබී ඇති තොරතුරුවලට අනුව අවම වශයෙන් ගිවිසුම් 10ක් 12ක් ඇති කර ගන්නා ලෙසට ශ්‍රී ලංකාවට බලපෑම් කිරීම ඔහුගේ මෙම සංචාරයේ අරමුණයි” යනුවෙන් වීරවංශ මන්ත්‍රීවරයා පැවසීය.
මෙම ව්‍යාපෘතිවලට ඉන්දියාවේ අරමුදල් සපයන හැඳුනුම්පත් ව්‍යාපෘතිය සහ ඉන්දියාවේ අදානි සමූහය සමඟ විදුලිබල හා බලශක්ති ව්‍යාපෘති කිහිපයක් ඇතුළත් බව ඔහු සඳහන් කළේය.
මෙම සංචාරයේ දිගුව වනුයේ අගෝස්තු මාසයේදී ඉන්දීය අගමැතිවරයාගේ ශ්‍රී ලංකා සංචාරය බවත් ඉන්දීය විදේශ ඇමැතිවරයාගේ පැය කිහිපයක සංචාරයේ අරමුණ පිළිබඳ දැනුවත් වීමට මෙම සභාවට සාධාරණ අයිතියක් ඇති බවත් ඔහු සඳහන් කළේය.
ශ්‍රී ලංකාව එකඟ වීමට බලාපොරොත්තු වන ව්‍යාපෘතිවල ඇත්තේ කුමක් ද යන්න රජයෙන් ද දැන ගැනීමට අවශ්‍ය බව වීරවංශ මන්ත්‍රීවරයා වැඩිදුරටත් පැවසීය.
ඉන්දියාවේ අරමුදල් සහිත හැඳුනුම්පත් ව්‍යාපෘතිය පිළිබඳ වීරවංශ මන්ත්‍රීවරයා මීට පෙර කණස්සල්ල පළකර ඇති අතර, ව්‍යාපෘතිය යටතේ ජෛවමිතික සහ පෞද්ගලික තොරතුරු ලබා දෙන්නේ කෙසේද යන්න පිළිබඳව ද අවධානය යොමු කරවා තිබිණි.
