2023 දෙසැම්බර් මාසයේ දියත් කළ ‘යුක්තිය’ මෙහෙයුම මගින් මේ දක්වා සැකකරුවන් 130,000කට ආසන්න සංඛ්‍යාවක් අත්අඩංගුවට ගෙන ඇති බව
පොලිස් මාධ්‍ය කොට්ඨාස සංඛ්‍යාලේඛන පෙන්වා දෙයි.

එම කොට්ඨාසයට අනුව මත්ද්‍රව්‍ය වැරදි සම්බන්ධයෙන් පුද්ගලයන් 129,825 දෙනෙකු අත්අඩංගුවට ගෙන තිබේ.

මේ අතරින් දළ වශයෙන් සැකකරුවන් 4,640කට පමණ වැඩිදුර ප්‍රශ්න කිරීම් සඳහා නියෝග නිකුත් කර ඇත.

ඊට අමතරව නීති විරෝධී ද්‍රව්‍ය විශාල ප්‍රමාණයක් ද පොලිසිය භාරයට ගෙන ඇත.

සාමාන්‍යයෙන් අයිස් ලෙස හඳුන්වන ක්‍රිස්ටල් මෙතම්ෆෙටමින් කිලෝග්‍රෑම් 270කට අධික ප්‍රමාණයක් සහ ගංජා කිලෝග්‍රෑම් 4,571ක් සහ ගංජා පැළ මිලියන 5.3කට අධික ප්‍රමාණයක් මේ වන විට පොලිස් භාරයේ පවතින බව වාර්තා වේ.

මීට අමතරව, පාතාල නායකයකු සහ අන්තර්ජාතික මත්ද්‍රව්‍ය ජාලයක සාමාජිකයකු බව කියන මිදිගම රුවන් අපරාධ පරීක්ෂණ දෙපාර්තමේන්තුවේ (CID) විශේෂ නිලධාරීන් කණ්ඩායමක් විසින් ඩුබායි සිට පිටුවහල් කරගනිමින් මෙරටට රැගෙනවිත් තිබිණි.

නීතිවිරෝධී මත්ද්‍රව්‍ය ජාවාරමේ නමගිය චරිතයක් වන ඔහුගේ මස්සිනා වන නදුන් චින්තක හෙවත් හරක් කටා බේරා ගැනීමට තැත් කිරීම ඇතුළු අපරාධ ක්‍රියා රුවන් මෙහෙයවූ බවට බලධාරීන් සැක කරයි.

හරක් කටා කලින් අත්අඩංගුවට ගැනීමෙන් පසුව ඔහුගේ මත්ද්‍රව්‍ය ජාලය කළමනාකරණය කිරීමේදී රුවන් සැළකිව යුතු කාර්යභාරයක් ඉටු කළ බවට ද බලධාරීහු විශ්වාස කරති.

කෙසේවෙතත් මහජන ආරක්‍ෂක ඇමැති ටිරාන් අලස් පවසා ඇත්තේ ‘යුක්තිය’ මෙහෙයුම ලබා ඇති ප්‍රගතිය පිළිබඳ තමා සතුටට පත් වන බවයි.

“මත්ද්‍රව්‍ය ජාවාරමට සම්බන්ධ ප්‍රධාන පුද්ගලයන් අත්අඩංගුවට ගැනීමේදී අපි සැළකිව යුතු ප්‍රගතියක් ලබා තිබෙනවා. හරක් කටා, සාලිඳු සහ මන්නා රමේෂ්, සහ මෑතක දී මිදිගම රුවන් වැනි පුද්ගලයන් අපි සාර්ථකව ගෙන්වා ගත්තා. අපගේ ප්‍රයත්නයන් හුදෙක් කුඩා පරිමාණ වෙළෙන්දන් අල්ලා ගැනීමෙන් ඔබ්බට විහිදෙනවා. ඩුබායි හි අපගේ මෙහෙයුම් මගින් පෙන්නුම් කරන පරිදි අපි ක්‍රියාකාරීව ප්‍රධාන පුද්ගලයන් පසුපස හඹා යමින් සිටිනවා, ”යනුවෙන් ඔහු ප්‍රකාශ කර තිබේ.

“මගේ අවධානය යොමුව තිබුණේ මත්ද්‍රව්‍ය බෙදාහැරීමේ ජාල විනාශ කිරීමට මිස ඇබ්බැහි වූ පුද්ගලයන්ට දඬුවම් ලබාදීමට නොවන බව මම මුල සිටම පැහැදිලිව ප්‍රකාශ කළා. බුද්ධි සම්පත් උපයෝගී කරගනිමින්, අපි රටපුරා සිටින විකුණුම්කරුවන්ගේ විස්තීර්ණ ලැයිස්තුවක් සම්පාදනය කළා. එය තමයි අපගේ මෙහෙයුම්වල පදනම වුණේ,” යනුවෙන් ඔහු පැහැදිලි කර ඇත.

“මත්ද්‍රව්‍ය වෙළඳාමේ ප්‍රධානීන් ඉලක්ක කර ගැනීමට මම පොරොන්දු වුණා. අපි ලබා තිබෙන ප්‍රගතිය ගැන මම ආඩම්බර වෙනවා,” යනුවෙන් ද ඔහු පවසා ඇත.

මහජන ආරක්‍ෂක අමාත්‍යාංශයේ උපදෙස් මත ශ්‍රී ලංකා පොලිසිය විසින් ‘යුක්තිය’ මෙහෙයුම මෙහෙයවනු ලබයි.

එය විශේෂ කාර්ය බළකායේ සහ ශ්‍රී ලංකා යුද හමුදාවේ සක්‍රීය දායකත්වයෙන් සමන්විත වන අතර පොලිස්පති දේශබන්දු තෙන්නකෝන්ගේ අධීක්ෂණය යටතේ පවතී.

ශ්‍රී ලංකා නීතීඥ සංගමය, එක්සත් ජාතීන්ගේ මානව හිමිකම් කවුන්සිලය ඇතුළු විවිධ මානව හිමිකම් සංවිධානවල විවේචනවලට මුහුණ දී තිබියදීත්, මෙහෙයුම ක්‍රියාත්මක වේ.