May 12, 2024
මැතිවරණ පැවැත්වීමට නියමිතව තිබියදී සංවර්ධන ව්‍යාපෘති සහ සහන යෝජනා ක්‍රම අධීක්‍ෂණය කිරීම සඳහා පළාත් පාලන මට්ටමින් යෝජිත ප්‍රජා උපදේශක කමිටු පිළිබඳ නව නියෝගයක් සම්බන්ධයෙන් මැතිවරණ කොමිෂන් සභාව සහ ජනාධිපති කාර්යාලය දැඩි මතභේදයක සිටින බව වාර්තා වේ.
මැතිවරණ කොමිසමේ සභාපති ආර්.එම්.ඒ.එල්. රත්නායක පළාත් පාලන මැතිවරණ අපේක්ෂකයන් මෙම උපදේශක කමිටුවලට පත්කිරීමේ හැකියාව පිළිබඳ අවධානය යොමුකරමින් ජනාධිපති ලේකම් සමන් ඒකනායකට ලිඛිතව දන්වා ඇත්තේ ඔවුන් තම දේශපාලන පක්ෂ ප්‍රවර්ධනය කරමින් මැතිවරණ නීති උල්ලංඝනය කිරීම වැළැක්විය නොහැකි බවයි.
සභාපතිවරයා ප්‍රකාශ කර ඇත්තේ කල් දැමූ පළාත් පාලන මැතිවරණය සඳහා ගොනු කළ නාමයෝජනා තවමත් වලංගු වන බැවින් සහ අදාළ මැතිවරණ නීති ක්‍රියාත්මක වන අතර මෙම කමිටු හරහා අපේක්ෂකයන්ට රාජ්‍ය දේපළ අවභාවිත කිරීමට ඉඩදිය නොහැකි බවයි.
එක් එක් ප්‍රාදේශීය සභා බල ප්‍රදේශය සඳහා ප්‍රජා උපදේශක කමිටු පත් කිරීම සම්බන්ධයෙන් ජනාධිපති ලේකම් සමන් ඒකනායක පළාත් ආණ්ඩුකාරවරුන්ට, පළාත් ප්‍රධාන ලේකම්වරුන්ට, දිස්ත්‍රික් ලේකම්වරුන්ට සහ ප්‍රාදේශීය ලේකම්වරුන්ට නිකුත් කළ චක්‍රලේඛයට ප්‍රතිචාර දක්වමින් මැතිවරණ කොමිසම මේ බව සඳහන් කර තිබේ.
මෙම සැලැස්ම යටතේ එක් එක් ප්‍රාදේශීය සභා බල ප්‍රදේශයන්හි උපදේශක කමිටු මගින් හඳුනාගත් ‘හදිසි සංවර්ධන’ කටයුතු සඳහා රුපියල් මිලියන 10ක් වෙන් කිරීමට නියමිතව තිබිණි.
මෙම යෝජනාව සඳහා ඇමැති මණ්ඩල අනුමැතිය ලැබී ඇති අතර, එහි අනෙකුත් රාජකාරි අතර, උරුමය ඉඩම් බෙදාදීමේ යෝජනා ක්‍රමය, නාගරික ප්‍රදේශවල නිවාස බෙදාදීම, කඳුකර සංවර්ධන ව්‍යාපෘති ක්‍රියාත්මක කිරීම, කෘෂිකාර්මික නවීකරණ ව්‍යාපෘති සහ නොමිලේ සහල් ලබාදීම අධීක්‍ෂණය කිරීමට සෑම කමිටුවකින්ම අපේක්ෂා කෙරේ.
කෙසේවෙතත්, ජනාධිපති කාර්යාල ආරංචි මාර්ග පවසන්නේ රුපියල් බිලියන 14 ක ව්‍යාපෘති අවසන් කිරීමට ඇති බැවින් යෝජිත කමිටු නැවැත්වීමට කිසිදු සැලසුමක් නොමැති බවයි.
මැතිවරණ කොමිෂන් සභාව ගත් ස්ථාවරය අනුව ව්‍යාපෘති ඉදිරියට ගෙන යා නොහැකි බැවින් රාජ්‍ය නිලධාරීන්ගේ කාර්ය සාධනයට බලපානු ඇති බවටත් මත පළවී තිබේ.
ජනාධිපතිවරණය තවමත් නිල වශයෙන් ප්‍රකාශයට පත් කර නොමැති බැවින් මැතිවරණ කොමිසම සඳහන් කරන්නේ පසුගිය වසරේ පැවැත්වීමට නියමිතව තිබූ නමුත් කල් දැමූ පළාත් පාලන මැතිවරණය පිළිබඳ බව ජනාධිපති ලේකම් කාර්යාලයේ අදහස බැව් වාර්තා වේ.
මැතිවරණ කොමිෂන් සභාව ජනාධිපති ලේකම්වරයා වෙත යැවූ ලිපියේ නුදුරේදීම කැඳවීමට නියමිත ජනාධිපතිවරණය පිළිබඳව ද සඳහන් කර ඇත.
