කැනඩාවේ ඔටාවා හිදී සිදුවූ මනුෂ්‍ය ඝාතනය සම්බන්ධයෙන් ශ්‍රී ලංකා රජය නිවේදනයක් නිකුත් කර ඇත.

පහතින් දැක්වෙන්නේ විදේශ කටයුතු අමාත්‍යංශය නිකුත් කළ එම නිවේදනයයි.

2024 මාර්තු 7 වන දින ඔටාවා හි Barrhaven හි නිවසකදී මවක්, දරුවන් හතරදෙනෙකු සහ පවුලේ හිතවතකු ඇතුළු ශ්‍රී ලාංකිකයන් හයදෙනකු ඛේදජනක ලෙස මියයෑම පිළිබඳව ඔටාවා හි ශ්‍රී ලංකා මහ කොමසාරිස් කාර්යාලය විසින් විදේශ කටයුතු අමාත්‍යාංශයට දන්වා ඇත.

මියගිය පවුලේ පියා එම ස්ථානයේදීම තුවාල ලබා ඇති අතර, පසුව ඔහු රෝහලට ඇතුළත් කර ඇති අතර, ඔහු මේ වනවිට ප්‍රතිකාර ලබයි.

මෙම ඝාතනය සම්බන්ධයෙන් නීතිය ක්‍රියාත්මක කිරීමේ අධිකාරිය විසින් 19 හැවිරිදි ශ්‍රී ලාංකිකයෙකු අත්අඩංගුවට ගෙන ඇති අතර, ඔහු මේ වන විට පොලිස් අත්අඩංගුවේ පසුවේ.

මහ කොමසාරිස් කාර්යාලයේ නිලධාරීන් දිවි බේරාගත් තැනැත්තා බැලීමට රෝහලට ගොස් ඇත.

අමාත්‍යාංශය ශ්‍රී ලංකාවේ සිටින පවුලේ සාමාජිකයන් සමඟ සන්නිවේදනය කරන අතර ඔවුන්ගේ පෞද්ගලිකත්වයට ගරු කරමින්, ශ්‍රී ලංකා මහ කොමසාරිස් කාර්යාලය හරහා අදාළ කැනේඩියානු බලධාරීන් සමඟ ඔවුන්ගේ ඉල්ලීම් සඳහා පහසුකම් සපයයි.

වින්දිතයන් සිහිකිරීමේ උපහාරයක් අපරාධ ස්ථානයේදී සංවිධානය කර ඇති අතර, 2024 මාර්තු 9 වැනි සෙනසුරාදා දින නගර සභා මන්ත්‍රීවරයකු විසින් විශේෂ යාච්ඤා කිරීමක් සැලසුම් කර ඇත.

මරණ පරීක්ෂණයෙන් අනතුරුව සිරුරු මුදාහැරීමෙන් පසුව අවසන් කටයුතු වින්දිතයන්ගේ පවුල්වල අයගේ කැමැත්ත පරිදි නියමිත වේලාවට සිදුකෙරේ.

විදේශ කටයුතු අමාත්‍යාංශයේ කොන්සියුලර් කටයුතු අංශය, ඔටාවා හි මහ කොමසාරිස් කාර්යාලය සමඟ සමීපව කටයුතු කරමින් විපතට පත් වූවන්ගේ පවුල්වලට අවශ්‍ය විධිවිධාන සපුරාලීම සඳහා අවශ්‍ය සියලු පියවර ගැනීමට කටයුතු කරයි.

මෙම ශෝකජනක අවස්ථාවේ විපතට පත් පවුලේ සාමාජිකයින් වෙත විදේශ කටයුතු අමාත්‍යාංශය අවංක ශෝකය ප්‍රකාශ කරයි.