January 28, 2024
වැට් බද්ද සඳහා ලියාපදිංචි නොවී ගනුදෙනුකරුවන්ගෙන් වැට් අය කරන ව්‍යාපාර වැටළීම දේශීය ආදායම් දෙපාර්තමේන්තුව විසින් ආරම්භ කර ඇතැයි එහි ජ්‍යෙෂ්ඨ නිලධාරියෙක් පැවසීය.
“වැට් ලියාපදිංචි ව්‍යාපාරික ආයතන ව්‍යාපාරික ගනුදෙනුවල යෙදෙන විට ඔවුන්ගේ වැට් බදු ලියාපදිංචි අංකය පෙනෙන ලෙස ප්‍රදර්ශනය කිරීම අනිවාර්යයයි. නීති විරෝධී ක්‍රියාවන් නිසා යම් කිසිවකු පීඩාවට පත්වුවහොත් ඔවුන්ට සෘජුවම දේශීය ආදායම් දෙපාර්තමේන්තුවේ කොමසාරිස් ජනරාල් වෙත පැමිණිලි කළ හැකියි. බොහෝදෙනෙක් පැමිණිලි කර තිබෙනවා, අපි ඔවුන් සම්බන්ධයෙන් ක්‍රියා කර තිබෙනවා,” යැයි දේශීය ආදායම් දෙපාර්තමේන්තුවේ ජ්‍යෙෂ්ඨ නියෝජ්‍ය කොමසාරිස් ජනරාල්වරයෙක් පැවසීය.
ලියාපදිංචි වැට් බදු ගෙවන ආයතනයක් නොවී කිසියම් සංවිධානයක් වැට් අයකර ඇති බවට පාරිභෝගිකයකුගෙන් ලද පැමිණිල්ලක් මත ක්‍රියාත්මක වූ දේශීය ආදායම් දෙපාර්තමේන්තුවේ නිලධාරීන් පසුගිය බදාදා කොළඹ නගරයේ ව්‍යාපාරික ආයතනයක් වටළා වැඩිදුර පරීක්ෂණ සඳහා ලිපි ලේඛන සහ එහි පරිගණක සිය භාරයට ගෙන තිබේ.
දේශීය ආදායම් දෙපාර්තමේන්තුවේ නිලධාරීන්ට මෙම ව්‍යාපාරික ආයතනයේ පරිශ්‍රයට ඇතුළුවීමට පොලිස් සහාය ලබාගැනීමට සිදුව තිබුණේ ආයතන කළමනාකාරිත්වය විසින් මුලින් ඔවුන්ට ඇතුළුවීම තහනම් කිරීම හේතුවෙනි.
“අපේ නිලධාරීන්ට පරිශ්‍රයට ඇතුළු වීමට ඉඩ නොදුන් නිසා අපට පොලිසියෙන් උදව් ඉල්ලා සිටීමට සිදුවුණා. පොලිස් නිලධාරීන් ඉදිරියේ, දේශීය ආදායම් දෙපාර්තමේන්තුවේ නිලධාරීන්ට අගුල විවෘත කර පරිශ්‍රයට ඇතුළුවීමට සිදුවුණා, ”යැයි දේශීය ආදායම් දෙපාර්තමේන්තුවේ උසස් නිලධාරියා පැවසීය.
මෙම ආයතනයෙන් අත්අඩංගුවට ගත් ද්‍රව්‍යවලට අමතරව, සමාගම් සමූහයක කොටසක් වන මෙම ආයතනය වැට් බදු ලිපිගොනු පවත්වාගෙන ගියේද සහ අදාළ බදු ගෙවා තිබේද යන්න තීරණය කිරීම සඳහා දේශීය ආදායම් දෙපාර්තමේන්තුව වෙනම විගණන පරීක්ෂණයක් ද ආරම්භ කර ඇති බව එම නිලධාරියා පැවසීය.
“අපට පැමිණිලි ලැබුණු පසු, ආයතනය හෝ පුද්ගලයා රුපියල් මිලියන 80ක වාර්ෂික පිරිවැටුම් සීමාවක් සමඟ වැට් බද්දට බැඳී සිටිනවාද යන්න සහ අදාළ බදු වරින් වර ගෙවන්නේද යන්න අපි විශ්ලේෂණය කරනවා,” යනුවෙන් එම නිලධාරියා ක්‍රියාවලිය පැහැදිලි කරමින් පැවසීය.
“ආයතනය හෝ පුද්ගලයා වැට් බදු සඳහා ලියාපදිංචි වී නැති බව පෙනී ගියහොත්, අපට දඬුවම් සමඟ නීතිමය ක්‍රියාමාර්ග ආරම්භ කළ හැකියි. ඊට අමතරව, ආයතනය විසින් අය කරන ලද අරමුදල් ආපසු අයකර ගැනීම සඳහා දෙපාර්තමේන්තුවට තක්සේරුවක් දියත් කළ හැකියි” යනුවෙන් ද ඔහු පැවසීය.
වැට් බද්ද-ලියාපදිංචි නොවූ ආයතනයක් විසින් වැරදි ලෙස වැට් බද්ද අය කර ඇති බව විශ්වාස කරන ඕනෑම පුද්ගලයකුට එවැනි පුද්ගලයන්ට හෝ ආයතනවලට එරෙහිව ක්‍රියාමාර්ග ගැනීම සඳහා ගනුදෙනුවේ නම, ලිපිනය සහ ලේඛනගත සාක්ෂි ඇතුළු අදාළ තොරතුරු දේශීය ආදායම් දෙපාර්තමේන්තුවේ කොමසාරිස් ජනරාල් වෙත යොමුකළ හැක.
