ලබන වසරේ පළමු මාස කිහිපයත් ජනතාවට දුෂ්කරතාවන්ට මුහුණදීමට සිදුවනු ඇතැයි ජනාධිපති රනිල් වික්‍රමසිංහ පැවැසීය.

2024 අයවැය ලේඛනය සම්බන්ධයෙන් පැවැත්වූ ජනමාධ්‍ය ආයතන ප්‍රධානීන් දැනුවත් කිරීමේ හමුවකට එක්වෙමින් ජනාධිපතිවරයා මේ බව සඳහන් කළේය.

මුද්‍රිත සහ විද්‍යුත් ජනමාධ්‍ය නියෝජනය කරමින් පුවත්පත් කතුවරු සහ ප්‍රවෘත්ති අධ්‍යක්ෂවරු ඊට එක්ව සිටියහ.

ජනාධිපති ලේකම් කාර්යාලයේදී ඊයේ පස්වරුවේ එම සාකච්ඡාව පැවැත්විණි.

“2024 වසරේ පළමු මාස කිහිපයත් දුෂ්කර වෙන්න යන්නේ. ක්‍රමයෙන් දියුණු වෙනවා. මේ වසරේ දළ දේශීය නිෂ්පාදනය ධන වශයෙන් ගන්න පුළුවන්. 2018 දළ දේශීය නිෂ්පාදනය ඩොලර් 94.5ක්. 2022 දළ දේශීය නිෂ්පාදනය ඩොලර් 77ට බැස්සා. 2023 දළ දේශීය නිෂ්පාදනය ඩොලර් 85ක් වගේ. අපි තවම 2018 තත්ත්වයට ඇවිත් නැහැ. ලබන වසරේදීත් ඒ තත්ත්වයට එන එකක් නැහැ. 2025 සිට තමයි අපේ ගමන යන්න වෙන්නේ. මෙය ඊට සූදානම්වීමක්” යැයි ජනාධිපතිවරයා එහිදී සඳහන් කළේය.

මෙහිදී වැඩිදුරටත් අදහස් දැක්වූ ජනාධිපතිවරයා කියාසිටියේ මෙවර අයවැය රටේ ආර්ථිකය සහ දේශපාලනය වෙනස්කරන අයවැයක් බවයි.

රටේ බිඳවැටුණු ආර්ථිකය යළි ගොඩනැඟීම තම අරමුණු වන අතර එම ඉලක්කයට තමා දැනටමත් ළඟාවෙමින් සිටින බව පැවැසූ ජනාධිපතිවරයා, දේශපාලනයකින් තොරව එම ඉලක්කය සාර්ථක ලෙස අවසන් කිරීම තම අභිප්‍රාය බවද පැවැසීය.

දේශපාලන පක්ෂ මැතිවරණ ඉලක්ක කර ගනිමින් කටයුතු කළත්, තම පළමු රාජකාරිය රට බංකොළොත්භාවයෙන් නිදහස් කරගැනීම වන අතර තමා අනෙකුත් කටයුතු දෙස අවධානය යොමුකරන්නේ ඉන් අනතුරුව බවද ජනාධිපතිවරයා කියා සිටියේය.