සෞදි අරාබියේ රියාද් හි ගෘහ සේවිකාවක් ලෙස සේවය කළ ගොතටුව ප්‍රදේශයේ පදිංචි නයනා දිල්රුක්ෂි (45) නමැති ශ්‍රී ලාංකික කාන්තාව ඇයගේ හාම්පුතා විසින් ගිනිතබා ඇති බව කියනු ලැබේ.

ශ්‍රී ලාංකික කාන්තාව ඇය මුහුණදුන් බිහිසුණු, අමිහිරි අත්දැකීම පිළිබඳ විස්තර අනාවරණය කර ඇත්තේ, ඇයගේ හාම්පුතා ඇයව මරා දැමීමට ආසන්න බවට චෝදනා කරමිනි.

මේ වසරේ පෙබරවාරි 08 වැනිදා රියාද් බලා පිටත්ව ගොස් ඇති දිල්රුක්ෂි, මසකට පමණ පසුව මාර්තු 07 වැනිදා, එම නිවසේ දරුවන් තිදෙනාගෙන් බාලයාට ආහාර නොදුන් බවට චෝදනා කරමින් හාම්පුතා විසින් මෙලෙස පුළුස්සා ඇත.

පිළිස්සුම් තුවාල සහිතව ශ්‍රී ලාංකික කාන්තාව ළඟම ඇති රෝහල වෙත රැගෙන ගොස් ඇති අතර, ඇය මාස හතකට ආසන්න කාලයක් ප්‍රතිකාර ලබාගැනීමෙන් අනතුරුව, බලධාරීන් ඇයව සීමිත ප්‍රවේශයක් සහිත නාඳුනන ස්ථානයක කඳවුරකට ගෙනගොස් තිබේ.

රියාද් හි ශ්‍රී ලංකා තානාපති කාර්යාලයේ නිලධාරීන් ස්ථාන මාරු කිරීමෙන් පසු දෙවතාවක් ඇය බැලීමට පැමිණ ඇති නමුත්, සිය ඉරණම අවිනිශ්චිත බව දිල්රුක්ෂි ප්‍රකාශ කරයි.