රැස්වීම්, දිරිගැන්වීමේ සංචාර, සම්මන්ත්‍රණ සහ ප්‍රදර්ශන ඇතුළු මහා පරිමාණ උත්සව සඳහා පහසුකම් සැලසීමේ අරමුණින්, කොළඹ වරාය නගරය නවීනතම ‘එයාර් ඩෝම්’ (වාතයෙන් පුම්බන ලද විශාල ගෝලාකාර ව්‍යුහයක්) ඉදිකරමින් සිටින බවත්, එය ලබන මාසය අවසන් වන විට විවෘත කිරීමට සූදානම් වනු ඇති බවත් වාර්තා වේ. අමුත්තන් 4,000කට පමණ පහසුකම් සැලසිය හැකි මෙම පරිශ්‍රය, ඩුබායි සහ ලොව අනෙකුත් ප්‍රධාන පෙළේ සම්මන්ත්‍රණ මධ්‍යස්ථානවල ඇති එවැනිම පහසුකම් අනුව යමින් ඉදිකෙරේ.

“මෙය, වරාය නගරයේ ඉදිකිරීමට නියමිත ශ්‍රී ලංකාවේ විශාලතම බහුකාර්ය සම්මන්ත්‍රණ මධ්‍යස්ථානය ස්ථාපිත කිරීමට පෙරාතුව ඉදිකෙරෙන තාවකාලික පහසුකමක්. එම ප්‍රධාන මධ්‍යස්ථානයට ආසන 4,000කින් යුත් ගෘහස්ථ බහුකාර්ය ශාලාවක්, පුද්ගලයන් 5,000කට රැඳී සිටිය හැකි එළිමහන් අවකාශයක් සහ ඊට යාබදව කාමර 400-450කින් යුත් ව්‍යාපාරික හෝටලයක් ඇතුළත් වෙනවා,” යැයි CHEC පෝට් සිටි කලම්බු (පෞද්ගලික) සමාගමේ ඉඩම් සංවර්ධන හා අලෙවි විධායක අධ්‍යක්ෂ/නියෝජ්‍ය සාමාන්‍යාධිකාරී ශලක විජේරත්න, වරාය නගරයේ සංවර්ධන කටයුතු පිළිබඳව අප පුවත්පත කළ විමසීමකට ලිඛිත පිළිතුරක් ලබා දෙමින් සඳහන් කළේය.

ආයෝජකයින් සඳහා දැනටමත් විවෘත කර ඇති මෙම හෝටලය තුළ නියෝජිතයින් 25 සිට 200 දක්වා පිරිසකට රැස්විය හැකි කුඩා රැස්වීම් ශාලා පහසුකම් ද පවතිනු ඇති බව ඔහු පැවසීය. යෝජිත සම්මන්ත්‍රණ සහ ප්‍රදර්ශන මධ්‍යස්ථානය සඳහා මූලික ශක්‍යතා අධ්‍යයනයන් සහ සාකච්ඡා මේ වන විටත් සිදුවෙමින් පවතින අතර, එහි ඉදිකිරීම් සඳහා වසර හතරක පමණ කාලයක් ගතවනු ඇතැයි අපේක්ෂා කෙරේ. “ඒ අතරතුර කාලයේදී, ප්‍රධාන සම්මන්ත්‍රණ මධ්‍යස්ථානය ඉදිකිරීමට බොහෝ කලකට පෙර උත්සව සඳහා අවශ්‍ය යටිතල පහසුකම් සැපයීම වෙනුවෙන් මේ වසර අවසන් වන විට ක්‍රියාත්මක කිරීමට නියමිත මෙම එයාර් ඩෝම් පරිශ්‍රය අපි හඳුන්වා දෙනවා,” යැයි ඔහු වැඩිදුරටත් පැවසීය.

රැස්වීම්, සම්මන්ත්‍රණ සහ ප්‍රදර්ශන සඳහා නැගී එන මධ්‍යස්ථානයක් ලෙස ශ්‍රී ලංකාවේ පිහිටීම පිළිබඳව අදහස් දක්වමින් ඔහු කියා සිටියේ, 2026 වසර වන විට මුළු සංචාරක පැමිණීම්වලින් සියයට 10ක් මෙම ක්ෂේත්‍රය හරහා ආකර්ෂණය කර ගැනීමට සහ ඒ හරහා ලැබෙන ආදායම ඇමරිකානු ඩොලර් බිලියන 1.36ක් දක්වා වර්ධනය කර ගැනීමට ශ්‍රී ලංකා සම්මන්ත්‍රණ කාර්යාංශය ඉලක්ක කර ඇති බවයි.

ගොඩනැගිලි හතරකින් සහ අක්කර 37කින් සමන්විත බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ සිට අමුත්තන් 5,000කට අධික පිරිසකට පහසුකම් සැලසිය හැකි ‘සිනමන් ලයිෆ්’ හි නවීන උත්සව ශාලා දක්වා විහිදෙන ස්ථාපිත මෙන්ම නව යටිතල පහසුකම් මගින් මෙම අරමුණට ශක්තියක් සැපයේ.

“ශ්‍රී ලංකාව සුවිශේෂී වන්නේ හුදෙක් යටිතල පහසුකම් නිසාම නොවෙයි; රටේ උපායමාර්ගික පිහිටීමත් ඊට හේතුවක්. භූ දේශපාලනික වශයෙන් ශ්‍රී ලංකාව නොබැඳි ප්‍රතිපත්තියක් අනුගමනය කරන රටක් වීම නිසා අන්තර්ජාතික ව්‍යාපාරික සමුළු පැවැත්වීමට සහ කලාපීය වෙළෙඳපොළවල් අතර සබඳතා ගොඩනගා ගැනීමට හිතකර පරිසරයක් නිර්මාණය වී තිබෙනවා. එමෙන්ම, අපගේ අසල්වැසි වෙළෙඳපොළවල් වන ඉන්දියාව සහ පාකිස්තානය සමඟ අපට නිදහස් වෙළෙඳ ගිවිසුම් තිබෙනවා වගේම, ප්‍රධාන ආර්ථිකයන් සමඟ ශක්තිමත් වෙළෙඳ සහ ආයෝජන සබඳතා ද පවතිනවා. මෙම සියලු සාධක එක්ව ගත් කල, ශ්‍රී ලංකාව හුදෙක් උත්සව පවත්වන ස්ථානයක් පමණක් නොව, දේශසීමා ඉක්මවා යන ව්‍යාපාරික කටයුතු සඳහා වේදිකාවක් සහ කලාපීය වෙළෙඳපොළවල් යා කරන පාලමක් ලෙස ස්ථානගත වෙනවා,” ශලක විජේරත්න වැඩිදුරටත් සඳහන් කළේය.