අත්‍යවශ්‍ය ගනුදෙනු අටක් සඳහා බදු ගෙවන්නන් හඳුනාගැනීමේ අංකය (TIN) ඉදිරිපත් කිරීම අනිවාර්ය කිරීමේ පියවර ක්‍රියාත්මක කිරීම 2027 අප්‍රේල් 1 වැනිදා දක්වා කල්දැමූ බව දේශීය ආදායම් දෙපාර්තමේන්තුව නිවේදනය කර ඇත.

දේශීය ආදායම් කොමසාරිස් ජනරාල්වරිය මෙම තීරණය තහවුරු කර ඇති අතර, නොවැම්බර් 1 වැනිදා සිට බලපැවැත්වෙන පරිදි ක්‍රියාත්මක වූ මෙම අවශ්‍යතාව සඳහා මාස පහක සහන කාලයක් ලබා දී තිබේ.

TIN සහතික ලබා ගැනීමේදී මහජනතාව මුහුණදුන් දැඩි අපහසුතා, දේශීය ආදායම් කාර්යාලවල පැවැති දිගු පෝලිම් සහ දෙපාර්තමේන්තුවේ මාර්ගගත (online) ලියාපදිංචි කිරීමේ පද්ධතියේ ඇති වූ බාධාවීම් හේතුවෙන් මෙම නිවේදනය නිකුත් කර ඇත.

මෙම කල්දැමීමට යටත් වන ගනුදෙනු අට වන්නේ බැංකු ගිණුම් ආරම්භ කිරීම, ගොඩනැගිලි සැලසුම් අනුමත කර ගැනීම, වාහන ලියාපදිංචි කිරීම, වාහන ආදායම් බලපත්‍ර අලුත් කිරීම, ඉඩම් ලියාපදිංචි කිරීම, ව්‍යාපාර ලියාපදිංචි කිරීම, සමාගම් කොටස් පවරා දීම සහ ණය පත් (credit cards) ලබා ගැනීමයි.

බැංකු ගිණුම් විවෘත කිරීම සහ වාහන ආදායම් බලපත්‍ර අලුත් කිරීම සඳහා රජය විසින් මීට පෙරද තාවකාලික සහනයක් ලබා දී තිබිණි.