ශ්‍රී ලංකා සංචාරක ප්‍රවර්ධන කාර්යාංශයේ සභාපති බුද්ධික හේවාවසම් සිය දෙවසරක ධුර කාලය අවසන් වීමෙන් පසුව ධුරයෙන් ඉල්ලා අස්වී ඇති අතර, ඊයේ (02) වන විටත් ඒ සඳහා නව සභාපතිවරයකු හෝ වැඩබලන සභාපතිවරයකු නිල වශයෙන් පත්කර නොමැත.

හේවාවසම්ගේ අවසන් රාජකාරි දිනය 2026 ඔක්තෝබර් 30 වැනිදා වූ අතර, මේ වන තෙක් ඒ සඳහා වෙනත් අයකු පත් කිරීම සම්බන්ධයෙන් නිල දැනුම්දීමක් සිදුකර නොමැති බව සංචාරක ක්ෂේත්‍රයේ ආරංචි මාර්ග සඳහන් කරයි.

ඉදිරි ශීත සෘතු සංචාරක කාලසීමාවට පෙර ප්‍රධාන අන්තර්ජාතික වෙළෙඳපොලවල් තුළ ශ්‍රී ලංකාව කෙරෙහි ඇති ආකර්ෂණය පවත්වා ගැනීම සඳහා සංචාරක ප්‍රවර්ධන කාර්යාංශය විසින් අතුරු ප්‍රවර්ධන වැඩසටහන් ආරම්භ කර ඇති අතරතුර මෙම ඉල්ලා අස්වීම සිදුවීම විශේෂත්වයකි.

මෙම තාවකාලික පියවරයන්, 2027 මුල් භාගයේදී දියත් කිරීමට නියමිත රුපියල් බිලියන 3.5 ක ගෝලීය සංචාරක ප්‍රවර්ධන ව්‍යාපාරය ආරම්භ වන තෙක් පවතින පරතරය පියවීමට උපකාරී වනු ඇතැයි අපේක්ෂා කෙරේ.

බුද්ධික හේවාවසම් මීට පෙර පෞද්ගලික සහ වෘත්තීයමය හේතූන් මත තමන් දැරූ ශ්‍රී ලංකා සංචාරක සංවර්ධන අධිකාරියේ සභාපති ධුරයෙන් ද ඉල්ලා අස්වූ අතර, සංචාරක අමාත්‍ය විජිත හේරත් විසින් එම ධුරය සඳහා සුරංජිත් වේවිට පත් කරන ලදී.