තායිවානයේ ප්‍රජාතන්ත්‍රවාදී ප්‍රගතිශීලී පක්ෂයේ තායිපේ නගරාධිපති අපේක්ෂක පූමා ෂෙන්ගේ මැතිවරණ ප්‍රචාරක ජාලය ඉලක්ක කරගනිමින් චීනයෙන් එල්ල වූයේ යැයි සැකකෙරෙන සයිබර් ප්‍රහාර මාලාවක් සම්බන්ධයෙන් තායිවාන ජාතික ආරක්ෂක කාර්යාංශය පරීක්ෂණයක් ආරම්භ කර තිබේ.

The Taipei Times පුවත්පත වාර්තා කරන පරිදි, මෙමගින් තායිවානයේ ප්‍රජාතන්ත්‍රවාදී මැතිවරණ ක්‍රියාවලියට බලපෑම් කිරීමට බීජිං පාලනය උත්සාහ කරන බවට නැවත වරක් දැඩි කතාබහක් නිර්මාණය වී ඇත.

තායිවාන පාර්ලිමේන්තුවේ විදේශ කටයුතු සහ ජාතික ආරක්ෂක කමිටුව හමුවේ අදහස් දක්වමින් ජාතික ආරක්ෂක කාර්යාංශයේ නියෝජ්‍ය අධ්‍යක්ෂ ජෙනරාල් චෙන් සුං-චි සඳහන් කළේ, බුද්ධි අංශ එක්ව මෙම චීන මැදිහත්වීම පිළිබඳ පරීක්ෂණ පවත්වන බවයි. ලබන නොවැම්බර් 28 වන දින පැවැත්වීමට නියමිත මැතිවරණය සාමකාමීව සහ සුරක්ෂිතව පැවැත්වීම සඳහා අවශ්‍ය සියලු පියවර ගන්නා බවද ඔහු වැඩිදුරටත් පැවසීය.

මෙම පරීක්ෂණවලින් අනතුරුව අදාළ වගකිවයුතු පුද්ගලයන්ට එරෙහිව අපරාධ චෝදනා යටතේ නීතිමය පියවර ගැනීමට ඉඩ ඇති බවද ඔහු සඳහන් කළේය.

පූමා ෂෙන්ගේ ප්‍රචාරක කාර්යාලය පෙන්වා දෙන්නේ තම අභ්‍යන්තර කාර්ය මණ්ඩල පද්ධති සහ ප්‍රසිද්ධ වෙබ් අඩවි ඇතුළු තීරණාත්මක ඩිජිටල් යටිතල පහසුකම් ඉලක්ක කරගනිමින් පසුගිය සිකුරාදා සිට ක්‍රමානුකූල සහ දැවැන්ත සයිබර් ප්‍රහාර මාලාවක් එල්ල වූ බවයි. වෙබ් අඩවියේ ගොනු උඩුගත කිරීමේ පද්ධතියේ පැවැති දුර්වලතාවක් අනිසි ලෙස භාවිත කරමින් පද්ධතියට රහසිගතව ඇතුළු වීමට හැකර්වරුන් කටයුතු කර තිබුණි. කෙසේ වෙතත්, අදාළ සර්වරය තුළ අභ්‍යන්තර පද්ධතිවල මුරපද හෝ දත්ත නොතිබූ බැවින් ප්‍රධාන අභ්‍යන්තර දත්ත පද්ධතියට හානි කිරීමට හැකර්වරුන් අසමත් වී ඇත.

සයිබර් ප්‍රහාරය හඳුනාගත් වහාම ක්‍රියාත්මක වූ ප්‍රචාරක කාර්යාලය, ව්‍යාජ ගිණුම් සහ අනිසි ලෙස ඇතුළු කළ ක්‍රමවේද ඉවත් කරමින් ආරක්ෂක පද්ධති ශක්තිමත් කිරීමට පියවර ගෙන තිබේ.

කෙසේ වෙතත්, ඉන් අනතුරුව පාක්ෂිකයන් සඳහා හඳුන්වා දුන් නව වෙබ් අඩවිය ඉලක්ක කරගනිමින්ද හැකර්වරුන් ප්‍රහාරයක් එල්ල කර ඇත. තායිපේ ටයිම්ස් වාර්තාවට අනුව, එම වෙබ් අඩවිය විවෘත කර පැයක් ඇතුළත විදේශීය IP කේත ඔස්සේ සත්‍යාපන කේත ලබාගැනීමේ ව්‍යාජ ඉල්ලීම් 70,000 කට අධික සංඛ්‍යාවක් එල්ල කරමින් පද්ධතිය අක්‍රිය කිරීමට උත්සාහ දරා තිබේ.