මැටි රූපවලට ඉඳිකටු ඇනීම වැනි විකාරරූපී විරෝධතා ක්‍රමවේදවල නිරත වීම සම්බන්ධයෙන් ඇතැම් විපක්ෂ කණ්ඩායම් විවේචනය කළ ජනාධිපති අනුර කුමාර දිසානායක, එවැනි ක්‍රියා පිටුපස ඇති මානසිකත්වය පිළිබඳව ප්‍රශ්න කර සිටියේය.

ඊයේ (31) පැවැති ජාතික විද්වත් සංවිධානයේ ජාතික මහා සමුළුව අමතමින් ජනාධිපතිවරයා පැවසුවේ, පැවති දේශපාලන සංස්කෘතියෙන් ප්‍රතිලාභ ලැබූ ඇතැම් කණ්ඩායම්වලට ජාතික ජන බලවේග ආණ්ඩුව විසින් හඳුන්වා දී ඇති වෙනස්කම් දරාගැනීමට නොහැකි වී ඇති බවයි.

රජයේ දේශපාලන ප්‍රතිසංස්කරණ හමුවේ මෙම කණ්ඩායම් ද්වේෂසහගත ප්‍රකාශ, අසත්‍ය චෝදනා සහ අසාමාන්‍ය විරෝධතා ක්‍රියාමාර්ගවල නිරත වන බවට හෙතෙම චෝදනා කළේය.

මැටි රූපවලට කටු ඇනීමේ සිදුවීම සම්බන්ධයෙන් අදහස් දැක්වූ ජනාධිපති දිසානායක, මැටි රූපයකට රිදවීමෙන් තවත් කෙනකුට වේදනාවක් දිය හැකියි සිතීමට තරම් ඇති වී තිබෙන්නේ කෙබඳු චින්තනයක්දැයි ප්‍රශ්න කළේය.

මෙවැනි ක්‍රියාවලින් පිළිඹිබු වන්නේ රට තුළ සිදුවෙමින් පවතින දේශපාලන පරිවර්තනය හමුවේ ඇතැම් කණ්ඩායම් මුහුණ දී සිටින අසරණභාවය බව ද ඔහු පැවසීය.

ජාතික ජන බලවේග රජය රුවන්වැලිසෑය ගිල්වීමට සැලසුම් කරන බවට කෙරෙන ප්‍රකාශ ද විවේචනය කළ ජනාධිපතිවරයා, මෙවැනි අසත්‍ය චෝදනාවක් කරන්නේ කෙසේදැයි ප්‍රශ්න කර සිටියේය.

පැහැදිලි අරමුණක් සහිත සංවිධානාත්මක දේශපාලන ව්‍යාපාර සහ විරෝධතාවලින් රටට හානියක් සිදුනොවන නමුත්, නිසි මගපෙන්වීමක් නැති අසංවිධානාත්මක කණ්ඩායම් මගින් සමාජ අස්ථාවරත්වයක් ඇති විය හැකි බවට ඔහු අනතුරු ඇඟවීය.

එබැවින් පැහැදිලි දේශපාලන දැක්මක් සහිතව සංවිධානාත්මක අයුරින් තම විරෝධතා පවත්වන ලෙස ජනාධිපති දිසානායක විපක්ෂ කණ්ඩායම්වලින් ඉල්ලා සිටියේය.

මෙවැනි විකාරරූපී ක්‍රියා හමුවේ රජයේ ගමන අඩාල නොවන නමුත්, රට අස්ථාවර කිරීමට ගන්නා උත්සාහයන් පිළිබඳව අවධානයෙන් පසුවන බව ද ඔහු වැඩිදුරටත් පැවසීය.

ගලගොඩඅත්තේ ඥානසාර හිමියන්ට ජනාධිපති සමාව ලබාදෙන ලෙස ඉල්ලමින් බෞද්ධ හිමිවරුන් පිරිසක් සහ ආධාරකරුවන් කොළඹ විහාරමහාදේවී උද්‍යානයේදී පැවැත්වූ විරෝධතාවයකින් පසුව ජනාධිපතිවරයා මෙම අදහස් පළකළේය.

ඔක්තෝබර් මැද භාගයේ ආරම්භ වූ මෙම විරෝධතාවයට සෙත් පිරිත් සජ්ඣායනා සහ විවිධ ශාන්තිකර්ම ඇතුළත් වූ අතර, එහිදී ජනාධිපතිවරයාට එරෙහිව සාප කිරීමේ හූනියම් යන්ත්‍ර සඳහා මැටි රූප භාවිත කළ බවටද වාර්තා විය.

එහිදී එම භික්ෂූන් වහන්සේලා ඉල්ලා සිටියේ ජනාධිපති දිසානායක විසින් ඥානසාර හිමියන්ට සමාව ලබා දිය යුතු බව හෝ ධුරයෙන් ඉල්ලා අස්විය යුතු බවයි.