සෞදි අරාබියේ නැගෙනහිර දම්මාම් නගරයේ පිහිටි කිං ෆාඩ් අන්තර්ජාතික ගුවන් තොටුපොළට එල්ල වූ ප්‍රහාරයකින් එක් අයකු මියගොස් තවත් අටදෙනකු තුවාල ලබා ඇති බව එරට සිවිල් ගුවන් සේවා අධිකාරිය ප්‍රකාශ කළේය.

සුළු තුවාලවල සිට බරපතල තත්ත්වයේ පසුවන තුවාලකරුවන් සියලුදෙනාම වෛද්‍ය ප්‍රතිකාර ලබාදීම සඳහා රෝහල් වෙත යොමුකර ඇති බව සිවිල් ගුවන් සේවා මහ අධිකාරිය නිකුත් කළ නිවේදනයක දක්වා ඇත.

ඊට පෙර දින, සෞදි අරාම්කෝ සමාගමට අයත් ෂෙයිබා තෙල් බිමේ පිහිටි ස්ථානයකට ප්‍රහාර එල්ල කිරීමට තැත් කළ ඩ්‍රෝන යානයක් සෞදි ගුවන් ආරක්ෂක බලකාය මඟින් විනාශ කිරීමෙන් අනතුරුව පුද්ගලයන් දෙදෙනකු මියගිය බව බලශක්ති අමාත්‍යාංශය පැවසීය.

හූති බලකායන් සහ සෞදි අනුග්‍රහය ලබන අන්තර්ජාතිකව පිළිගත් යේමන රජය අතර අර්බුදය උග්‍රවීමත් සමඟ සෞදි ගුවන් තොටුපොළවල් ඉලක්ක කරගනිමින් එල්ල වූ ප්‍රහාර මාලාවේ නවතම සිදුවීම මෙය වේ.

පසුගිය සතියේ, ඔක්තෝබර් 11 වැනි දින රියාද් හි කිං කාලිද් අන්තර්ජාතික ගුවන් තොටුපොළට එල්ල වූ ප්‍රහාරයකින් එක් අයකු මියගොස් 11 දෙනකු තුවාල ලැබූ බව සෞදි අරාබිය වාර්තා කළේය.

ඔක්තෝබර් 10 වැනි දින, එම ගුවන් තොටුපොළටම එල්ල වූ වෙනත් ප්‍රහාරයකින් පුද්ගලයන් 12 දෙනකු ජීවිතක්ෂයට පත්වී 300 කට වැඩි පිරිසක් තුවාල ලැබූ බව සිවිල් ගුවන් සේවා අධිකාරිය වාර්තා කර තිබිණි.

පවතින හූති ප්‍රහාර හමුවේ සෞදි අරාබියේ පිහිටි සිය රාජ්‍යතාන්ත්‍රික දූත මණ්ඩලවල සේවය කරන රාජ්‍යතාන්ත්‍රිකයන්ට සහ ඔවුන්ගේ පවුල්වල සාමාජිකයන්ට වහාම එරටින් පිටවන ලෙස එක්සත් ජනපද රාජ්‍ය දෙපාර්තමේන්තුව බදාදා නියෝග කළේය.

කලාපයේ තවත් එක්සත් ජනපද දූත මණ්ඩල කිහිපයක සිටින පවුල්වල සාමාජිකයන් ද ආපසු කැඳවීමට සැලසුම් කර ඇති බව ඇමරිකානු නිලධාරීන් රොයිටර් පුවත් සේවයට පවසා ඇත.

රියාද් හි පිහිටි ඇමරිකානු තානාපති කාර්යාලය ද හූතිවරුන් විසින් සෞදි අරාබියට ඉදිරියේදී එල්ල කළ හැකි ප්‍රහාර පිළිබඳව අවධානයෙන් පසුවන ලෙස බදාදා ආරක්ෂක අනතුරු ඇඟවීමක් නිකුත් කළේය.