පකිස්ථානයේ පාසල් ගොඩනැගිල්ලක් කඩා වැටී සිසුන් 33 ක් ජීවිතක්ෂයට

පාකිස්ථානයේ පේෂාවර් නගරයේ පාසල් ගොඩනැගිල්ලක කොටසක් කඩා වැටීමෙන් සිසුන් 33 දෙනෙකු සහ ගුරුවරියක ජීවිතක්ෂයට පත්ව තිබේ.

මෙම අනතුරින් තවත් පුද්ගලයින් 19 දෙනෙකුට වැඩි පිරිසක් තුවාල ලබා ඇති අතර, ඔවුන්ගෙන් පස්දෙනෙකුගේ තත්ත්වය බරපතල බව රෝහල් ප්‍රකාශකයෙකු වාර්තා කළේය.

අනතුර සිදු වූ ස්ථානයෙන් ලැබෙන ඡායාරූප මගින් ගොඩනැගිල්ල කඩා වැටීමේ විශාලත්වය පෙන්නුම් කරන අතර, සුන්බුන් අතර සිරවී සිටි දරුවන්ගේ බෙල්ල දක්වාම පස් සහ ගොඩනැගිලි කොටස් ගොඩගැසී තිබූ ආකාරය දුටු බව සිද්ධිය ඇසින් දුටුවෙකු විස්තර කළේය.

අතිශය පටු වීදියක පිහිටි මෙම පාසල් ගොඩනැගිල්ලේ වහලයේ කොන්ක්‍රීට් තට්ටු ප්‍රමිතියෙන් තොරව ඉදිකර තිබූ අතර, මුළු ගොඩනැගිල්ලම දරාගත නොහැකි අධික බරකින් යුක්ත වූ බව උසස් පොලිස් නිලධාරියෙක් පැවසීය.

මෙම ශෝචනීය මරණ සම්බන්ධයෙන් “පූර්ණ හා විධිමත් පරීක්ෂණයක්” පවත්වන බව පාකිස්ථාන අග්‍රාමාත්‍ය ෂෙහ්බාස් ෂරීෆ් ප්‍රකාශ කර ඇති අතර, පාසලේ හිමිකරු මේ වන විටත් අත්අඩංගුවට ගෙන ඇත.