මත්පැන් බෝතල්වල අලවනු ලබන ස්ටිකර් මුද්‍රණය කිරීම සඳහා වන ටෙන්ඩරයේ කොන්දේසි, ජනාධිපති ලේකම් කාර්යාලයේ නිලධාරියෙකුට වාසි වන අයුරින් සංශෝධනය කර ඇති බවට පාර්ලිමේන්තු මන්ත්‍රී චාමර සම්පත් දසනායක පාර්ලිමේන්තුවේදී චෝදනා කළේය.

“මෙය රුපියල් මිලියන ගණනක ටෙන්ඩරයක් නිසා ඉතා බරපතල තත්ත්වයක්” යනුවෙන් මන්ත්‍රීවරයා මෙහිදී පැවසීය.

යම් කෙනෙකුගේ පටු අරමුණු ඉටු කරගැනීම සඳහා මෙම වෙනස්කම් සිදුකර ඇති බව පැවසූ මන්ත්‍රීවරයා, අල්ලස් හෝ දූෂණ චෝදනා විමර්ශන කොමිෂන් සභාව මගින් පරීක්ෂණ පවත්වනු ලබන සමාගම්වලට පවා වාසි වන ආකාරයේ කොන්දේසියක් ද මෙම ටෙන්ඩරයට ඇතුළත් කර ඇති බව පැවසුවේය.

එසේම, නීතිය ක්‍රියාත්මක කිරීමේදී පවතින දෙබිලි පිළිවෙත ප්‍රශ්න කළ මන්ත්‍රීවරයා, ඇතැම් දේශපාලනඥයන් අත්අඩංගුවේ තබාගෙන සිටින අතරතුර, විවිධ චෝදනාවලට ලක්ව සිටින තවත් පිරිසකට නිදහසේ සැරිසැරීමට ඉඩ දී ඇති බවට ද චෝදනා කළේය.

“නාමල් රාජපක්ෂ මන්ත්‍රීවරයා, මම සහ තවත් පිරිසක් බන්ධනාගාරගත කර සිටින අතරේ, මහා පරිමාණ වංචාවලට සම්බන්ධ බවට චෝදනා එල්ල වූ අය නිදහසේ සැරිසරනවා,” යනුවෙන් ද ඔහු පැවසීය.

මීට අමතරව, බාල ගල් අඟුරු මිලදී ගැනීමේ චෝදනාව සම්බන්ධයෙන් අමාත්‍ය කුමාර ජයකොඩිට එරෙහිව මෙතෙක් කිසිදු පියවරක් ගෙන නොමැතිවීම පිළිබඳ ප්‍රශ්න කළ මන්ත්‍රීවරයා දෙහිවල ප්‍රදේශයෙන් නිවසක් ලබා ගැනීමට උත්සාහ කළ බව කියන තවත් අමාත්‍යවරයෙකු පිළිබඳව ද සඳහන් කළේය.

තවද, උකස් තැබූ රන් භාණ්ඩ සඳහා ලබාගත් ණය ආපසු ගෙවීම සම්බන්ධයෙන් මහ බැංකුව ගෙන ඇති තීරණයක් ද මන්ත්‍රීවරයාගේ දැඩි දෝෂදර්ශනයට ලක් විය. එම ණය වාරික වශයෙන් ගෙවීමට ණයගැතියන්ට ඉඩ නොදෙන ලෙසත්, මුළු මුදලම එකවර ගෙවා දමන ලෙසත් පෞද්ගලික බැංකුවලට උපදෙස් දී ඇති බව ඔහු පැවසීය.

“මේ රටේ අසරණ ජනතාව තමන්ගේ රන් භාණ්ඩ උකස් කරන්නේ ජීවත් වෙන්නයි. ඒ නිසා මෙම පියවර ඉතාම අසාධාරණයි,” යනුවෙන් ද මන්ත්‍රීවරයා වැඩිදුරටත් සඳහන් කළේය.