2026 වසරේ දෙවන කාර්තුවේදී ශ්‍රී ලංකාවේ තරුණ රැකියා විරහිත අනුපාතය 17.8% ක මට්ටමක පවතින බව ජනලේඛන හා සංඛ්‍යාලේඛන දෙපාර්තමේන්තුව විසින් නිකුත් කරන ලද නවතම දත්ත වාර්තා පෙන්වා දී තිබේ.

විශේෂයෙන්ම තරුණ කාන්තාවන් අතර මෙම අගය 22.4% ක් දක්වා ඉහළ යෑම, රැකියා වෙළෙඳපොළට පිවිසෙන තරුණ පිරිස් මුහුණ දෙන දැඩි අභියෝග මනාව මතුකර දක්වා ඇත.

අප්‍රේල් සිට ජූනි දක්වා කාලය ආවරණය වන පරිදි දිවයින පුරා නිවාස ඒකක 6,250 ක් අදාළ කරගනිමින් ක්‍රියාත්මක කරන ලද මෙම ශ්‍රම බලකා සංගණනයට අනුව, වයස අවුරුදු 15 ත් 24 ත් අතර පසුවන 150,684 දෙනකු රැකියා විරහිතව පසුවන බව ඇස්තමේන්තු කර තිබේ.

නව සංඛ්‍යාලේඛනවලට අනුව, තරුණ පිරිමින්ගේ රැකියා විරහිත අනුපාතය 15.5% ක් වන අතර, තරුණ කාන්තාවන්ගේ අගය 22.4% ක් වීම තුළින් රැකියා අවස්ථා සම්බන්ධයෙන් සැලකිය යුතු පරතරයක් පවතින බව තහවුරු වී ඇත.

එමෙන්ම, වයස අවුරුදු 25 ත් 29 ත් අතර පසුවන පිරිස් අතර ද සමස්ත රැකියා විරහිතභාවය 12.1% කි.

මෙම වයස් කාණ්ඩයේ පිරිමින්ගේ අගය 7.7% ක් වෙද්දී, කාන්තා අගය 19.7% ක් ලෙස සැලකිය යුතු ලෙස ඉහළ අගයක් ගෙන තිබේ.

මෙහි විශේෂත්වය වන්නේ, උසස් අධ්‍යාපන සුදුසුකම් සහිත තරුණ ප්‍රජාව අතරද යම් රැකියා විරහිත අනුපාතයක් පැවතීමයි.

අපොස උසස් පෙළ හෝ ඊට වැඩි සුදුසුකම් සහිත පිරිස් අතර රැකියා විරහිත අනුපාතය 6.7% ක් වන අතර, පිරිමින් අතර එය 3.9% ක් වුවද කාන්තාවන් අතර එය 9.6% ක් දක්වා ඉහළ ගොස් ඇත.