චීන වාහන නිෂ්පාදකයින්ගෙන් එල්ල වන දැඩි තරගකාරීත්වය හමුවේ, ටොයෝටා සමාගමේ සුප්‍රකට SUV රථ පෙළගැස්මේ කුඩාම මාදිලිය වන නව Land Cruiser FJ රථය ජපානය තුළ අපේක්ෂිත අලෙවි ඉලක්ක අභිබවා යමින් ගිනිකොනදිග ආසියාව පුරා විශාල ජනප්‍රියත්වයක් ලබාගනිමින් සිටියි.

බ්ලූම්බර්ග් (Bloomberg) පුවත් වාර්තාවකට අනුව, ටොයෝටා සමාගම 2026 මැයි මැද සිට අගෝස්තු දක්වා කාලය තුළ ජපානයේදී Land Cruiser FJ රථ 12,000 කට ආසන්න සංඛ්‍යාවක් ලියාපදිංචි කර ඇති අතර, එය ඔවුන්ගේ මාසික අලෙවි ඉලක්කය වූ ඒකක 1,300 සැබවින්ම අභිබවා යාමකි.

මීට අමතරව, මෙම සංයුක්ත (compact) SUV රථය දැනට වෙළඳපොළට නිකුත් කර ඇති තායිලන්තය, පිලිපීනය සහ වියට්නාමය යන රටවලද ඒකක 3,000 කට ආසන්න ප්‍රමාණයක් අලෙවි වී ඇත.

බොහෝ විට Baby Land Cruiser ලෙස හඳුන්වනු ලබන මෙම Land Cruiser FJ මාදිලිය නිර්මාණය කර ඇත්තේ, විශේෂයෙන්ම පටු මාර්ග පවතින ආසියානු වෙළඳපොළවල් ඉලක්ක කරගනිමින් ටොයෝටාහි ජනප්‍රිය රෆ්-රෝඩ් (off-road) වාහනයේ කුඩා සංස්කරණයක් සඳහා වූ ඉල්ලුමට ප්‍රතිචාරයක් ලෙසය.

ජපානයේදී ජපන් යෙන් මිලියන 4.5 කින් (ඇමරිකානු ඩොලර් 28,500 කින් පමණ) ආරම්භ වන මෙම ආසන පහකින් යුත් SUV රථය, ලීටර් 2.7 පෙට්‍රල් එන්ජිමකින්, වේග හයේ ස්වයංක්‍රීය ගියර් පද්ධතියකින් (6-speed automatic transmission) සහ 4-wheel-drive පද්ධතියකින් සමන්විත වේ.

මෙම වාහනය නිෂ්පාදනය කරනු ලබන්නේ තායිලන්තයේ වන අතර, 2026 මාර්තු මාසයේදී එහි අලෙවිය ආරම්භ කිරීමෙන් පසුව මැයි මාසයේදී ජපාන වෙළඳපොළට හඳුන්වාදෙන ලදී.

තරගකාරී මිල ගණන් සහිත විදුලි වාහන (EV) සමග චීන වාහන නිෂ්පාදකයන් වේගයෙන් ව්‍යාප්ත වන ආසියානු කලාපය තුළ සිය ප්‍රබල නියෝජනය පවත්වා ගැනීමේ උපායමාර්ගයේ කොටසක් ලෙස ටොයෝටා සමාගම මෙම මාදිලිය ස්ථානගත කරයි.

එමෙන්ම, අප්‍රිකාව සහ මැදපෙරදිග පුරා පිහිටි වෙළඳපොළවලද මෙම Land Cruiser රථය සඳහා විශාල ඉල්ලුමක් ඇතිවනු ඇතැයි සමාගම අපේක්ෂා කරයි.

ටොයෝටාහි දැනට පවතින Land Cruiser 70, 250 සහ 300 මාදිලි පෙළට එක්වන මෙම FJ රථය, සැබෑ Land Cruiser සන්නාමයට හිමි කල්පැවැත්ම සහ off-road කාර්යක්ෂමතාව රැකගනිමින් පාරිභෝගිකයින්ට කුඩා ප්‍රමාණයේ විකල්පයක් ලබා දෙයි.

කෙසේවෙතත්, ශ්‍රී ලංකාව සඳහා මෙම වාහනය නිකුත් කරන නිල දිනයක් හෝ මිල ගණන් ටොයෝටා සමාගම විසින් මෙතෙක් ප්‍රකාශයට පත්කර නොමැත.