Flydubai ගුවන් යානය තුළදී එහි ඕමාන ජාතික සහායක ගුවන් නියමුවා විසින් තියුණු ආයුධයකින් පහර දී තුවාල සිදුකරන ලද ඉන්දියානු ජාතික ප්‍රධාන ගුවන් නියමු ස්මිට් මච්ඡාර්ගේ වීරත්වය ඇගයීම සඳහා ඇමෙරිකානු නියෝජිත මන්ත්‍රී මණ්ඩලයට විශේෂ යෝජනාවක් ඉදිරිපත් කර තිබේ.

ජොෂ් ගොතයිමර් , දොන් බේකන් සහ මයිකල් මැකෝල් යන මන්ත්‍රීවරුන් විසින් ඉදිරිපත් කරන ලද මෙම යෝජනාව ‘ෆ්ලයිඩුබායි ගුවන් යානයේ නායක ස්මිට් මච්ඡාර්, එහි කාර්ය මණ්ඩලය සහ මගීන් ඇගයීම සහ එම ගුවන් යානයට එල්ල කිරීමට තැත් කළ ත්‍රස්ත ප්‍රහාරය හෙළා දැකීම’ ලෙස නම් කර ඇති අතර, එහිදී සිදු වූ සිදුවීම විස්තර කරමින් මච්ඡාර්ගේ නිර්භීත ක්‍රියාකලාපය අගය කර ඇත.

“2026 සැප්තැම්බර් 30 වන දින, මගීන් 174 දෙනෙකු පමණ පටවාගත් ෆ්ලයිඩුබායි 1073 දරන ගුවන් යානය ඩුබායි ජාත්‍යන්තර ගුවන් තොටුපළෙන් ඉශ්‍රායලයේ ටෙල් අවීව් හි බෙන් ගුරියන් ගුවන් තොටුපළ බලා ගමන් ආරම්භ කළ අතර, එහි ගමන් කළ පිරිසෙන් බහුතරයක් ඉශ්‍රායල ජාතිකයින් වූ අතර ඇමෙරිකානු පුරවැසියන් 4 දෙනෙකු සහ ළමුන් 27 දෙනෙකුද ඒ අතර වූහ,” යනුවෙන් එම යෝජනාවේ සඳහන් වේ.

“ගුවනින් ගමන් කරමින් තිබූ යානයේ නියමු කුටිය තුළදී සහායක ගුවන් නියමුවා විසින් එහි ඇති හදිසි අවස්ථා සඳහා භාවිත කරන පොරවකින් ප්‍රධාන ගුවන් නියමුවාට ප්‍රහාර එල්ල කර යානයේ පාලනය සියතට ගැනීමට උත්සාහ කර ඇති අතර, එහිදී තත්පර 30 කටත් අඩු කාලයකදී ගුවන් යානය අඩි 14,000 කට වඩා පහතට කඩා වැටී ඇත,” යනුවෙන් එම යෝජනාව මගින් සිද්ධියේ බිහිසුණු බව විස්තර කර තිබේ.

“ඉන්දියානු පුරවැසියෙකු වන ප්‍රධාන ගුවන් නියමු ස්මිට් මච්ඡාර් තමන්ට එල්ල වූ ප්‍රහාරයට එරෙහිව සටන් කර ඇති අතර, බරපතල තුවාල ලබා සිටියදී පවා සිය ඉතිරි ශක්තිය යොදවා නියමු කුටියේ දොර විවෘත කිරීමට කටයුතු කර ඇත. ඒ අනුව යානයේ ගමන් කළ නිවාඩු නිකේතන ගුවන් නියමුවන්ට නියමු කුටියට ඇතුළු වී යානය ගොඩබෑමටත්, කාර්ය මණ්ඩලයට සහ මගීන්ට එක්ව සහායක නියමුවා මෙල්ල කර ගැනීමටත් අවස්ථාව සැලසුණි. ඉන් අනතුරුව, සියලුම මගීන්ගේ සහ කාර්ය මණ්ඩලයේ ජීවිත ආරක්ෂා කරමින් ගුවන් යානය සවුදි අරාබියේ තබූක් ගුවන් තොටුපළට සුරක්ෂිතව ගොඩබස්වන ලදී,”

“එමෙන්ම, සහායක ගුවන් නියමුවා තැත් කර ඇත්තේ ත්‍රස්තවාදී ක්‍රියාවක් සිදුකිරීමට බව එක්සත් අරාබි එමීර් රාජ්‍යයේ බලධාරීන් පැවැත්වූ පරීක්ෂණවලදී අනාවරණය වූ බව 2026 ඔක්තෝබර් 03 වන දින එරට නීතිපතිවරයා නිල වශයෙන් ප්‍රකාශ කළේය,” යනුවෙන්ද එම යෝජනාවේ වැඩිදුරටත් සඳහන් වේ.