බන්ධනාගාර ගතකර සිටින පූජ්‍ය ගලගොඩඅත්තේ ඥානසාර භික්ෂුව ගිහි ඇඳුමින් අධිකරණයට ඉදිරිපත් කිරීමට බන්ධනාගාර දෙපාර්තමේන්තුව ගත් තීරණයට එරෙහිව, අද කොළඹ අධිකරණ සංකීර්ණය අසලදී සාමකාමී විරෝධතාවක් සංවිධාන කර ඇතැයි වාර්තා වේ.

කෙසේවෙතත්, බරපතළ වැඩ සහිත සිරදඬුවම් නියම වූ සිරකරුවන් බන්ධනාගාරය මගින් ලබාදෙන ඇඳුම් ඇඳීම බන්ධනාගාර රෙගුලාසිවලට අනුව අනිවාර්ය වන බව බන්ධනාගාර කොමසාරිස් සහ මාධ්‍ය ප්‍රකාශක සේනක පල්ලෙතැන්න පැවසුවේය.

බන්ධනාගාරගත කෙරෙන භික්ෂූන් වහන්සේලා සම්බන්ධයෙන් වන රෙගුලාසි සහ සිරකරුවන් අධිකරණයට ඉදිරිපත් කිරීමේදී අනුගමනය කළ යුතු ඇඳුම් භාවිතය පිළිබඳ නීතිරීති ඒ ආකාරයෙන්ම ක්‍රියාත්මක කළ බවද ඔහු වැඩිදුරටත් සඳහන් කළේය.

අධිකරණයට අපහාස කිරීමේ චෝදනාවට වරදකරු කරමින් ලබාදුන් වසර හයක සිරදඬුවමේ ඉතිරි කාලය ගෙවා දැමීම සඳහා ඥානසාර භික්ෂුව බන්ධනාගාරගත කිරීමත් සමඟ මෙම මතභේදාත්මක තත්ත්වය හටගෙන ඇත.