October 6, 2026
ශ්‍රී ලංකා ක්‍රිකට් පරිපාලනය සඳහා දේශපාලන මැදිහත්වීම් සිදු වන බවට පවසමින් අන්තර්ජාතික ක්‍රිකට් කවුන්සිලය (ICC) අනුගමනය කරන ක්‍රියාමාර්ගය පිළිබඳ ප්‍රශ්න කරන ශ්‍රී ලංකා ක්‍රිකට් ප්‍රතිසංස්කරණ කමිටුවේ සභාපති ඉරාන් වික්‍රමරත්න, මෙරට ක්‍රිකට් ක්ෂේත්‍රයේ දැනට සිදුවෙමින් පවතින ප්‍රතිසංස්කරණ පිටුපස ඇති පසුබිම ජාත්‍යන්තර ක්‍රිකට් කවුන්සිලය නිසි ලෙස වටහා ගත යුතු බව පවසයි.
අද දෙරණ 360 වැඩසටහනට එක්වෙමින් මේ බව සඳහන් කළ ඔහු යෝජිත නව ශ්‍රී ලංකා ක්‍රිකට් පනත යටතේ යම් යම් අවස්ථාවලදී මැදිහත් වීමට විෂයභාර අමාත්‍යවරයාට ඇති බලතල, අන්තර්ජාතික ක්‍රිකට් කවුන්සිලය විසින් රජයේ අනවශ්‍ය අතපෙවීමක් ලෙස සැලකීමට ඉඩ තිබේදැයි සම්බන්ධයෙන් ද අදහස් පළ කළේය.
ඒ සම්බන්ධයෙන් ජාත්‍යන්තර ක්‍රිකට් කවුන්සිලය ද නිසි අවබෝධයක් ලබාගත යුතු බව පැවසූ ඉරාන් වික්‍රමරත්න, අමාත්‍යවරයාට එවැනි බලතල භාවිත කළ හැක්කේ කුමන පදනමක් සහ සීමාවන් යටතේද යන්න යෝජිත නව පනත මගින් ඉතා පැහැදිලිව දක්වා ඇති බව ද පෙන්වා දුන්නේය.
වත්මන් පද්ධතිය යටතේ ද අමාත්‍යවරයා සතුව බලතල පවතින නමුත්, යෝජිත නව පනත මගින් එම බලතල භාවිත කළ යුතු ආකාරය පිළිබඳ වඩාත් පැහැදිලි ක්‍රියාපටිපාටියක් ස්ථාපිත කෙරෙන බව ද ඔහු සඳහන් කළේය.
2023 වසරේදී එකල ක්‍රීඩා අමාත්‍යවරයා ශ්‍රී ලංකා ක්‍රිකට් පාලන අධිකාරියට මැදිහත් වීම හේතුවෙන් ජාත්‍යන්තර ක්‍රිකට් කවුන්සිලය විසින් ශ්‍රී ලංකා ක්‍රිකට් තහනම් කිරීමට ගත් තීරණය වැරදි යැයි විශ්වාස කරන්නේදැයි ඉරාන් වික්‍රමරත්න වෙත එම වැඩසටහනේදී ප්‍රශ්නයක් යොමුවිය.
ඊට පිළිතුරු ලබා දුන් ඔහු පැවසුවේ “අදටත් සමහර රටවල දේශපාලනඥයන් ඉන්නවා,” යනුවෙනි.
ශ්‍රී ලංකා ක්‍රිකට් ආයතනය ස්වාධීනව කටයුතු කිරීම සහ එහි පාලන, නියාමන හෝ පරිපාලන කටයුතුවලට රාජ්‍ය මැදිහත්වීම් සිදු නොවීම තහවුරු කිරීම ඇතුළු සාමාජිකයකු ලෙස ඉටුකළ යුතු ප්‍රධාන වගකීම් දැඩි ලෙස පැහැර හැර ඇති බව පවසමින් 2023 නොවැම්බර් මාසයේදී ICCය විසින් ශ්‍රී ලංකා ක්‍රිකට් සාමාජිකත්වය තහනම් කිරීමට පියවර ගෙන තිබිණි.
කෙසේවෙතත්, යෝජිත නව රාමුව මගින් අනාගතයේදී සිදුවන ඕනෑම මැදිහත්වීමක් සම්බන්ධයෙන් ඉහළ විනිවිදභාවයක් ඇති වන බව ඉරාන් වික්‍රමරත්න මහතා පෙන්වා දෙයි.
“අපි කිසිම දෙයක් හොර රහසේ කරන්නේ නැහැ. අපි හැමදේම පැහැදිලිව ඉදිරිපත් කරලා තියෙන්නේ,” යනුවෙන් ඔහු වැඩිදුරටත් පැවසීය.
එබැවින්, අමාත්‍යවරයාගේ මැදිහත්වීම් සිදුවන ආකාරය සහ ඊට අදාළ ක්‍රියාපටිපාටිය නීතියෙන්ම පැහැදිලිව දක්වා ඇති මෙවැනි විනිවිදභාවයෙන් යුතු පද්ධතියක් ජාත්‍යන්තර ක්‍රිකට් කවුන්සිලය විසින් පිළිගත යුතු බව ද ඔහු අවධාරණය කළේය.
