October 5, 2026
යෝජිත මෙට්‍රෝ බස්රථ සේවා මධ්‍යස්ථානයක් සඳහා අතුරුගිරියේ පිහිටි තමන්ට අයත් ඉඩමකට අවසරයකින් තොරව ඇතුළු වී එහි මායිම් වැට සහ ගේට්ටු ඉවත් කර ඇති බවත්, එම ඉඩම භාවිත කිරීමට තම සමාගම කිසිදු එකඟතාවක් ලබා දී නොමැති බවත් මිලේනියම් නිවාස සංවර්ධකයන් (Millennium Housing Developers) විසින් පවසා තිබේ.
අතුරුගිරිය, ඔරුවල ප්‍රදේශයේ පිහිටි මෙම ඉඩම සම්බන්ධයෙන් යෝජිත බස් නැවතුම්පොළක්‌ සඳහා කරන ලද ඉල්ලීමක් ගැන ශ්‍රී ලංකා ආයෝජන මණ්ඩලයෙන් ලිපි ලැබී ඇති බව සමාගම සඳහන් කර ඇත.
එහෙත්, අනාගත සංවර්ධන ව්‍යාපෘතියක් සඳහා වත්කමක් ලෙස රඳවාගෙන ඇති මෙම ඉඩම ව්‍යාපෘතියක් සඳහා නිදහස් කර ගැනීමට හෝ අත්පත් කර ගැනීමට තමන් කිසිදු එකඟතාවක් ලබා දී නොමැති බව ඔවුන් විසින් අවධාරණය කර තිබේ.
සැප්තැම්බර් 27 වැනි දින කිසිදු අවසරයකින් තොරව ඉඩමට ඇතුළු වී එහි මායිම් ව්‍යුහයන් ඉවත් කර ඇති බව නිරීක්ෂණය වීමත් සමඟ, ඒ පිළිබඳව අතුරුගිරිය පොලිසිය වෙත මූලික පැමිණිල්ලක් ගොනුකර ඇත.
පෞද්ගලික අයිතිය ඇති ඉඩමක් අත්පත් කර ගැනීම නිසි නීත්‍යානුකූල ක්‍රියාවලියක් හරහා, සමාගමේ සහ කොටස්කරුවන්ගේ හිමිකම් ආරක්ෂා කරමින් සිදු කළ යුතු බව පෙන්වා දෙන සමාගම, මේ වන විට නීතිමය උපදෙස් ලබා ගනිමින් අදාළ බලධාරීන් සමඟ සාකච්ඡා කරමින් සිටී.
මේ අතර, කොළඹ මධ්‍ය කරගත් මාර්ග කිහිපයක් ඔස්සේ නව බස් රථ සමඟ පුළුල් කරන ලද මෙට්‍රෝ බස් සේවයක් රජය විසින් මෑතකදී ආරම්භ කරනු ලැබූ අතර, ගමනාගමන තදබදය ලිහිල් කිරීම සහ ආරක්ෂිත මහජන ප්‍රවාහන සේවයක් සැපයීම අරමුණු කරගත් මෙම ව්‍යාපෘතිය, ලංකා මෙට්‍රෝ ට්‍රැන්සිට් ආයතනය හරහා ක්‍රියාත්මක වේ.
ඉදිරියේදී දිවයිනේ අනෙකුත් ප්‍රධාන නගර වෙතද එය දීර්ඝ කිරීමට නියමිතය.
(උපුටාගැනීම – Daily FT)
