මෙරට ජ්‍යෙෂ්ඨ පුරවැසියන්ගේ අයිතිවාසිකම් සුරක්ෂිත කිරීම සහ ඔවුන් මුහුණදෙන විවිධ ගැටලුවලට ඵලදායී ලෙස විසඳුම් ලබාදීම සඳහා ශ්‍රී ලංකා පොලිස් දෙපාර්තමේන්තුව තුළ වෙන්වූ විශේෂ පොලිස් ඒකකයක් ස්ථාපිත කරන ලෙස ශ්‍රී ලංකා මානව හිමිකම් කොමිෂන් සභාව විසින් පොලිස්පතිවරයාගෙන් නිල ඉල්ලීමක් කර තිබේ.

ශ්‍රී ලංකා මානව හිමිකම් කොමිෂන් සභාවේ සභාපති, විශ්‍රාමික ශ්‍රේෂ්ඨාධිකරණ විනිසුරු එල්.ටී.බී. දෙහිදෙනියගේ අත්සනින් යුතුව නිකුත් කරන ලද විශේෂ නිවේදනයක සඳහන් කර ඇත්තේ, මෙරට වැඩිහිටි ජනගහනය මුහුණදෙන අභියෝගයන් පිළිබඳව දීර්ඝ වශයෙන් කරුණු අධ්‍යයනය කිරීමෙන් අනතුරුව මෙම යෝජනාව ඉදිරිපත් කළ බවයි.

වර්තමානයේ පවතින සංකීර්ණ සමාජීය සහ ආර්ථික සාධක මෙන්ම විවිධ ආයතනික බාහිර බලපෑම් හේතුවෙන් ජ්‍යෙෂ්ඨ පුරවැසියන්ගේ අයිතිවාසිකම් උල්ලංඝනය වීමේ ප්‍රවණතාවක් රට තුළ වර්ධනය වෙමින් පවතින බව කොමිෂන් සභාව විසින් පෙන්වා දී ඇත.

තම පවුල්වල සාමාජිකයන් සමඟ නිවෙස්වල පදිංචිව සිටින වැඩිහිටියන් මෙන්ම, වැඩිහිටි නිවාස සහ විවිධ ආයතනගතව වෙසෙන වැඩිහිටියන් ද එක ලෙස මෙවැනි අගතියට පත්වීම් සහ නොසලකා හැරීම්වලට ලක්වන බව කොමිෂන් සභාව වැඩිදුරටත් අනාවරණය කර තිබේ.

වැඩිහිටියන්ට සිදුවන ශාරීරික, මානසික සහ සූරාකෑමට ලක්කිරීම් සම්බන්ධ පැමිණිලි විභාග කිරීම, ඔවුන්ට අවශ්‍ය නීතිමය උපදෙස් හා ආරක්ෂාව කඩිනමින් ලබාදීම සඳහා මෙවැනි විශේෂිත පොලිස් ඒකකයක් පිහිටුවීම අත්‍යවශ්‍ය කරුණක් බව මානව හිමිකම් කොමිෂන් සභාව විසින් වැඩිදුරටත් අවධාරණය කර ඇත.

පොලිස් දෙපාර්තමේන්තුව තුළ ජ්‍යෙෂ්ඨ පුරවැසියන් උදෙසාම වෙන්වූ ඒකකයක් ස්ථාපිත කිරීම මගින් ඔවුන්ගේ ආරක්ෂාව තහවුරු කිරීමටත්, මුහුණදෙන ගැටලුවලට ක්ෂණික සහ සංවේදී ලෙස මැදිහත් වීමටත් මඟපෑදෙනු ඇතැයි කොමිෂන් සභාව විශ්වාස කරනු ලබයි.