යෝජිත නව ශ්‍රී ලංකා ක්‍රිකට් පනත යටතේ ජාතික ක්‍රිකට් තේරීම් කමිටු සාමාජිකයන් සෘජුව පත්කිරීමේ බලය ක්‍රීඩා අමාත්‍යවරයාගෙන් ඉවත් කර, එම වගකීම ශ්‍රී ලංකා ක්‍රිකට් පාලක මණ්ඩලය වෙත පැවරීමට කටයුතු යොදා ඇත.

පසුගිය සතියේ ගැසට් කරන ලද මෙම නව පනත් කෙටුම්පත මගින් ජාතික පිරිමි සහ කාන්තා තේරීම් කමිටු පත්කිරීමේ බලය ශ්‍රී ලංකා පාලක මණ්ඩලයට හිමිවේ.

ශ්‍රී ලංකා ක්‍රිකට් ආයතනය ඉදිරිපත් කරන නාමයෝජනා අතුරින් ක්‍රීඩා අමාත්‍යවරයා විසින් තේරීම් කමිටු පත්කළ වසර ගණනාවක පැවති ක්‍රමවේදයට මෙය විශාල වෙනසක් එක් කරයි. ඒ අනුව ජාතික කණ්ඩායම් තෝරන නිලධාරීන් පත්කිරීමේ ආණ්ඩුවේ සෘජු මැදිහත්වීම සම්පූර්ණයෙන්ම අහෝසි වේ.

කෙසේවෙතත්, අමාත්‍යවරයාගේ මෙම බලතල ඉවත්වුවද, තේරීම් කමිටු සාමාජිකයන් ක්‍රිකට් පාලක මණ්ඩලයෙන් ස්වාධීන වන බවක් පනතේ පැහැදිලිව සඳහන් නොවේ. 21(4) වගන්තියට අනුව ඕනෑම කමිටුවකට හෝ අනුකමිටුවකට පුද්ගලයන් පත්කිරීමේ බලය පාලක මණ්ඩලයට හිමිවන අතර, 21(5) වගන්තිය අනුව ඔවුන් යහපත් හා චරිතවත් බවකින් මෙන්ම අවශ්‍ය පළපුරුද්ද සහ කුසලතාවලින් යුක්ත විය යුතුය.

මීට අමතරව, SLC ආයතනයේ අධ්‍යක්ෂවරුන් හෝ සේවකයන් නොවන අයටද කමිටුවල සේවය කිරීමට ඉඩ සලසා ඇත. 21(3) වගන්තිය මගින් SLC පරිපාලන තනතුරුවල වසර 8 ක උපරිම සේවා කාලයක් නියම කරමින් එකම පුද්ගලයන් දීර්ඝ කාලයක් පරිපාලනයේ රැඳී සිටීම වැළැක්වීමට උත්සාහ කරයි.

කමිටුවල බලතල, වගකීම් සහ සැකැස්ම ඇතුළත් ලිඛිත කොන්දේසි පාලක මණ්ඩලයේ අනුමැතියට යටත් වන බැවින්, තේරීම් කමිටුවල ක්‍රියාකාරීත්වයට පාලක මණ්ඩලයෙන් දැඩි බලපෑමක් එල්ල විය හැක. එහෙත් 21(10) වගන්තිය අනුව SLC සභාපතිවරයාට සහ ප්‍රධාන විධායක නිලධාරියාට තේරීම් කමිටු රැස්වීම්වලට සහභාගී විය හැකි වුවද, ඡන්දය ප්‍රකාශ කිරීමේ බලයක් නොමැත.

තේරීම් කමිටු පත්කිරීමේ නිශ්චිත ක්‍රියාපටිපාටිය ඉදිරියේදී සැකසෙන නීතිරීති මගින් තීරණය කිරීමට නියමිතය. මෙමගින් දේශපාලන මැදිහත්වීම් ඉවත්වුවද, පාලක මණ්ඩලය මගින් පත්කරනු ලබන තේරීම් කමිටු සාමාජිකයන් එම පාලක මණ්ඩලයෙන් කොතෙක් දුරට ස්වාධීන වේද යන්න පිළිබඳව නව සංවාදයක් ගොඩනැගී ඇත.