එංගලන්තයට එරෙහිව පැවැති විස්සයි විස්ස ක්‍රිකට් තරගාවලිය 3-0ක් ලෙස පරාජයට පත්වීමෙන් අනතුරුව, ක්‍රිකට් කණ්ඩායමේ T20 පිතිකරණ පෙළෙහි ප්‍රධාන ප්‍රතිසංවිධානයක් සිදුකළ යුතු බව හිටපු ක්‍රිකට් නායක කුමාර සංගක්කාර අවධාරණය කර ඇත.

තුන්වැනි විස්සයි විස්ස තරගයෙන් පසු අදහස් දක්වමින් සංගක්කාර පවසා ඇත්තේ, මෙම තරගාවලිය තුළින් ශ්‍රී ලංකාව සහ ලෝකයේ ප්‍රමුඛ පෙළේ කණ්ඩායම් අතර ඇති දැවැන්ත පරතරය පැහැදිලිවම පෙනෙන බවත්, ලෝකයේ ප්‍රමුඛ පෙළේ කණ්ඩායම් සමඟ තරග වැදීමට හැකි ප්‍රබල පිතිකරුවන් හයදෙනෙකුගෙන් යුත් පෙරමුණක් කණ්ඩායම විසින් ගොඩනගා ගතයුතු බවත්ය.

කණ්ඩායමේ පවතින ලොකුම ගැටළුව පිතිකරණය වන අතර, විශේෂයෙන්ම මැද ඕවරවලදී ලකුණු රැස්කිරීමේ වේගය පවත්වාගැනීමට නොහැකි වීම දිගුකාලීන දුර්වලතාවක් බව ඔහු පෙන්වාදී ඇත.

ඉනිමේ මුල් ඕවර 6 තුළ ක්‍රියාත්මක වන පන්දු රැකීමේ සීමා උපරිමයෙන් ප්‍රයෝජනයට ගනිමින්, තරගයේ ආධිපත්‍යය තමන් සතුකර ගතහැකි ප්‍රබල පිතිකරුවන් හයදෙනෙකුගෙන් යුත් බලගැන්වුණු පෙරමුණක් ශ්‍රී ලංකාව සකස් කර ගන්නේ කෙසේද යන්න සංගක්කාර පෙන්වා දී තිබේ.

කණ්ඩායමේ ඉදිරි වෙනස්කම් පිළිබඳව අදහස් දක්වමින් ඔහු සඳහන් කර ඇත්තේ, කුසල් මෙන්ඩිස් නැවත කණ්ඩායමට පැමිණීමේදී ආරම්භක පිතිකරු ස්ථානය සඳහා කමිල් මිෂාර සහ ලහිරු උදාර අතරින් සුදුසුම ක්‍රීඩකයා තෝරාගැනීමට තේරීම් කමිටුවට සිදුවන බවයි.

කණ්ඩායමේ මැදපෙළ ශක්තිමත් කිරීම සඳහා දසුන් ශානකගේ වේගවත් පහරවල් එල්ල කිරීමේ හැකියාව අතිශයින් වැදගත් වන බවද ඔහු ප්‍රකාශ කර ඇත.

ඉදිරියට පැවැත්වෙන එක්දින තරගාවලියට පූර්ණ ජයග්‍රාහී මානසිකත්වයකින් යුතුව මුහුණදෙන ලෙස ක්‍රිකට් කණ්ඩායමෙන් ඉල්ලා සිටින සංගක්කාර, කණ්ඩායම නිවැරදිව සංවිධානය කර, දක්ෂ ක්‍රීඩකයන් කෙරෙහි විශ්වාසය තබා ස්ථාවර ප්‍රතිපත්තියක් අනුගමනය කරන ලෙස අවධාරණය කරයි.

ශ්‍රී ලංකා කණ්ඩායමේ ඉදිරි ගමන මන්දගාමී සහ දිගු එකක් වනු ඇත, නමුත් ඊට අවශ්‍ය මූලික අඩිතාලම දැන්ම දමාගත යුතු බවද ඔහු වැඩිදුරටත් පවසා තිබේ.