September 11, 2026
ඉන්දීය අග්රාමාත්ය නරේන්ද්ර මෝදි සහ රුසියානු ජනාධිපති ව්ලැදිමීර් පුටින් අතර පැවති සාකච්ඡාවකදී දෙරට අතර පවතින දිගුකාලීන සබඳතා තවදුරටත් ගැඹුරු කර ගැනීමට එකඟතාවකට පැමිණ තිබේ.
බටහිර රටවල නීතිවලින් තොරව ගෝලීය ආර්ථික වර්ධනයක් අත්කර ගැනීම සඳහා බ්රික්ස් (BRICS) සංසදය විසින් නව වේදිකාවක් ගොඩනගා ගත යුතු බව එහිදී පුටින් ප්රකාශ කළේය.
ඉන්දියාවේ නවදිල්ලි නුවර පැවැත්වෙන බ්රික්ස් සමුළුවට සහභාගී වීම සඳහා රුසියානු ජනාධිපතිවරයා ඉන්දියාවට පැමිණ සිටින අතර එම සමුළුව ආරම්භ වීමට ප්රථම මෙම හමුව පැවැත්විණි.
චීන ජනාධිපති ෂී ජින්පින් සහ ඉරාන ජනාධිපති මසූද් පෙෂෙෂ්කියාන් ඇතුළු රාජ්ය නායකයන් කිහිප දෙනෙක්ම මෙම සමුළුවට සහභාගී වීමට නියමිතය. යුක්රේන සහ ඉරාන යුද ගැටුම් හේතුවෙන් නාවික හා වෙළඳ සැපයුම් දාමවලට බාධා එල්ල වී ඇති පසුබිමක් තුළ, ඇමරිකාව, ගල්ෆ් අරාබි රටවල්, රුසියාව, ඉරානය සහ ඊශ්රායලය සමඟ ශක්තිමත් සබඳතා පවත්වා ගැනීමට ඉන්දියාව රාජ්ය තාන්ත්රික මට්ටමින් දැඩි පරිශ්රමයක් යොදමින් සිටියි.
ගල්ෆ් කලාපීය ගැටුම සම්බන්ධයෙන් ඉරානය සහ එක්සත් අරාබි එමීර් රාජ්යය විරුද්ධ පාර්ශ්වවල පසුවීම හේතුවෙන් බ්රික්ස් සාමාජිකයන් අතර අදහස් වෙනස්කම් පවතින මුත්, ජාත්යන්තර නීති හා ආයතන කෙරෙහි බලපෑම් කරමින් තම ජාත්යන්තර පිළිගැනීම පුළුල් කර ගැනීමට මෙම සංවිධානය උත්සාහ කරමින් සිටියි.
බ්රික්ස් සංවිධානය භූ-දේශපාලනික කණ්ඩායමක සිට ව්යාපාරිකයන්, තාක්ෂණික සමාගම් සහ ආයෝජකයන් අතර සහයෝගීතාව වර්ධනය කිරීම මෙන්ම ගෙවීම් පද්ධති සහ ඒකාබද්ධ යටිතල පහසුකම් වැඩිදියුණු කිරීම කෙරෙහි අවධානය යොමු කළ ප්රායෝගික ආර්ථික හවුල්කාරීත්වයක් බවට පත්වෙමින් පවතින බව පුටින්ගේ විශේෂ දූතයා වන කිරිල් ඩ්මිට්රීව් රොයිටර්ස් පුවත් සේවයට ප්රකාශ කළේය.
