September 12, 2026
ඉන්දීය අග්රාමාත්ය නරේන්ද්ර මෝදි සහ රුසියානු ජනාධිපති ව්ලැඩිමීර් පුටින් අතර පැවැති සාකච්ඡාවලදී බලශක්ති සහ ආරක්ෂක ක්ෂේත්ර ඇතුළු අංශ රැසකින් දෙරට අතර පවතින විශේෂ සබඳතාව තවදුරටත් ශක්තිමත් කර ගැනීමට නායකයින් දෙපළ එකඟතාව පළ කළ බව ඉන්දියාව ප්රකාශ කළේය.
යුක්රේන සහ ඉරාන යුද ගැටුම් හේතුවෙන් නාවික ගමනාගමනයට සහ වෙළෙඳ කටයුතුවලට බාධා එල්ල වී තිබියදීත්, ඇමෙරිකා එක්සත් ජනපදය, ගල්ෆ් අරාබි රටවල්, රුසියාව, ඉරානය සහ ඊශ්රායලය සමඟ පවතින සබඳතා සමබරව පවත්වාගෙන යාමට නවදිල්ලිය දැඩි රාජ්යතාන්ත්රික උත්සාහයක නිරත වෙමින් සිටියි.
ඉන්දීය අගනුවරදී ආරම්භ වීමට නියමිත බ්රික්ස් (BRICS) රාජ්ය නායක සමුළුවට පෙරදින මෙම සාකච්ඡාව පැවැත්විණි. චීන ජනාධිපති ෂී ජින්පින් සහ ඉරාන ජනාධිපති මසූඩ් පෙසෙෂ්කියන් ඇතුළු නායකයන් රැසක් මෙම සමුළුවට එක්වීමට නියමිතය. ඉරාන යුද ගැටුම් හමුවේ බ්රික්ස් සාමාජික රටවල් අතර මතභේද හටගෙන තිබුණද, සංවිධානයේ ගෝලීය බලපෑම ඉහළ නැංවීම ඔවුන්ගේ අරමුණ වී තිබේ.
“සාගරික වෙළෙඳාමට මෙන්ම ඉන්දීය නාවිකයන්ගේ ආරක්ෂාවට තර්ජනයක් වී ඇති බටහිර ආසියාවේ සහ කළු මුහුද කලාපයේ පවතින අර්බුදකාරී තත්ත්වයන් පිළිබඳව අග්රාමාත්ය මෝදි සහ ජනාධිපති පුටින් අදහස් හුවමාරු කර ගත්හ” යැයි ඉන්දීය විදේශ කටයුතු අමාත්යාංශය නිකුත් කළ නිවේදනයක දැක්වේ.
ඕනෑම අර්බුදයක් රාජ්යතාන්ත්රික සාකච්ඡා මාර්ගයෙන් විසඳාගත යුතු බවත්, සාම සාධක ප්රයත්නයන් සඳහා සහාය වීමට ඉන්දියාව සූදානමින් සිටින බවත් අග්රාමාත්ය මෝදි මෙහිදී යළිත් අවධාරණය කළ බව එම නිවේදනයේ වැඩිදුරටත් සඳහන් වේ.
“දෙරට අතර පවතින විශේෂිත වූත් වරප්රසාද ලත් වූත් උපායමාර්ගික සහකාරිත්වය තවදුරටත් ශක්තිමත් කිරීම සඳහා අඛණ්ඩව කටයුතු කිරීමට දෙ නායකයෝ එකඟ වූහ” යනුවෙන් ඉන්දීය විදේශ කටයුතු අමාත්යාංශය ප්රකාශ කළේය.
ඇතැම් රටවල් රුසියාව සමඟ පවතින බලශක්ති, ලෝහ හෝ පොහොර වෙළෙඳාම නැවැත්වීමෙන් යුක්රේන අර්බුදය විසඳිය නොහැකි බවත්, එය විසඳිය හැක්කේ සාකච්ඡා සහ රාජ්යතාන්ත්රික ක්රියාමාර්ග තුළින් පමණක් බවත් නවදිල්ලිය වැඩිදුරටත් පෙන්වා දෙයි.
