දැනට රක්ෂිත බන්ධනාගාරගත කර සිටින ශ්‍රී ලංකා පොදුජන පෙරමුණේ ජාතික සංවිධායක නාමල් රාජපක්ෂගේ මාමණ්ඩිය වන ව්‍යාපාරික තිලක් වීරසිංහ, සිය දියණිය වන ලිමිණි වීරසිංහ සක්‍රීය දේශපාලනයට පිවිසීමට සූදානම් වන බවට පැතිර යන කතා ප්‍රතික්ෂේප කරමින් කියාසිටියේ ඇයගේ ක්ෂණික වගකීම විය යුත්තේ තම ස්වාමිපුරුෂයාට සහ දරුවන්ට සහය වීම බවයි.

Truth with Chamuditha YouTube නාලිකාව සමඟ පැවැති දීර්ඝ සම්මුඛ සාකච්ඡාවකට එක්වෙමින් තිලක් වීරසිංහ පවසන්නේ, සැප්තැම්බර් 12 වැනිදා අනුරාධපුරයේ පැවැත්වීමට නියමිත පොදුජන පෙරමුණේ රැලියේදී ලිමිණි වේදිකාවට ගොඩවීමට තීරණය කර ඇති බවක් තමන් නොදන්නා බවයි.

“දැනට මම දන්නේ නැහැ ලිමිණි අනුරාධපුරයේදී වේදිකාවට නගිනවා කියලා” යැයි පවසන ඔහු, වත්මන් තත්ත්වය හමුවේ එවැනි පියවරක් සුදුසු යැයි තමන් නොසිතන බවද වැඩිදුරටත් පවසයි.

නාමල් රාජපක්ෂ රක්ෂිත බන්ධනාගාරගතව සිටින මෙම අවස්ථාවේ ලිමිණිගේ මුල්තැන විය යුත්තේ ඇගේ පවුල බව තිලක් වීරසිංහ සඳහන් කරයි.

“මේ වෙලාවේ ඇගේ කාර්යය දේශපාලන වේදිකාවලට නැගීම නෙවෙයි. ඇයට වෙනත් වගකීම් තියෙනවා – පවුල, දරුවන් සහ නාමල් ගැන බලාගැනීම,” යැයි ඔහු පවසයි.

අනුරාධපුර රැලියේදී ලීමිණි වේදිකාවේ පෙනීසිටීමට තමන් විරුද්ධ වන්නේදැයි ඇසූ විට තිලක් වීරසිංහ පවසන්නේ, මෙම අවස්ථාවේදී එය “සුදුසු නැති” බව තමන් විශ්වාස කරන බවයි.

නාමල් රාජපක්ෂට තරඟ කිරීමට නොහැකි වුවහොත් ලිමිණි අනාගත ජනාධිපති අපේක්ෂක ලෙස ඉදිරිපත් විය හැකි බවට පැතිර යන කටකතාද ඔහු ප්‍රතික්ෂේප කළේය.

පවුල තුළ එවැනි කිසිදු සාකච්ඡාවක් සිදුවී නොමැති බවත්, මෙම ප්‍රකාශය මෙතරම් ප්‍රමුඛතාවයක් ලබාගත්තේ කෙසේදැයි ප්‍රශ්න කරන බවත් තිලක් වීරසිංහ ප්‍රශ්න කරයි.

කෙසේවෙතත්, නාමල් රාජපක්ෂට දීර්ඝ සිරදඬුවමක් නියම වුවහොත් අනාගතයේදී ලිමිණි දේශපාලනයට පිවිසීමේ හැකියාව ගැන විමසූ විට, තිලක් වීරසිංහ පවසන්නේ, එය වෙනස් තත්ත්වයක් වන අතර එවිට දේශපාලන තීන්දු ගැන සලකා බැලිය හැකි බවයි.

නාමල් රාජපක්ෂගේ වත්මන් නීතිමය තත්ත්වය ලිමිණි දේශපාලනයට පිවිසීමට ඉබේම හේතුවක් කර නොගත යුතු බව ඔහු අවධාරණය කරයි.

මෙම සම්මුඛ සාකච්ඡාවේදී තිලක් වීරසිංහ, නාමල් රාජපක්ෂ සිය ව්‍යාපාරවලට සම්බන්ධ වී සිටි බවට හෝ නීතිවිරෝධී යැයි කියනු ලබන මුදල් නීත්‍යානුකූල වත්කම් බවට පත්කිරීමට තමන්ගේ සමාගම් භාවිත කළ බවට එල්ල වන චෝදනාද ප්‍රතික්ෂේප කරයි.

සිය ව්‍යාපාරවල නාමල් රාජපක්ෂගේ කිසිදු හවුල්කාරිත්වයක් හෝ මූල්‍යමය මැදිහත්වීමක් නොමැති බවත්, සිය සමාගම්වලට ලැබුණු මුදල් නීත්‍යානුකූල මාර්ග හරහා පැමිණි බවත් ඔහු ප්‍රකාශ කරයි.