පුපුරන ද්‍රව්‍ය භාවිත කර අල්ලන ලද බවට සැකකෙරෙන මත්ස්‍ය කිලෝ ග්‍රෑම් 3,200කට අධික ප්‍රමාණයක් මුලතිව්හිදී සිදුකළ මෙහෙයුමකදී අත්අඩංගුවට ගත් බව ශ්‍රී ලංකා නාවික හමුදාව විසින් පවසනු ලබයි.

නාවික හමුදාවේ නැගෙනහිර විධානයට අයත් එස්.එල්.එන්.එස්. ගෝඨාභය නාවික ආයතනයේ පිරිසක් සහ ධීවර හා ජලජ සම්පත් දෙපාර්තමේන්තුවේ නිලධාරීන් එක්ව සැප්තැම්බර් 7 වැනි දින මෙම මෙහෙයුම ක්‍රියාත්මක කර ඇත.

පුට්ටුමලන් මුහුදු වෙරළ ප්‍රදේශයේ පිහිටි සැකකටයුතු මත්ස්‍ය එකතු කිරීමේ මධ්‍යස්ථානයක් පරීක්ෂා කිරීමේදී, පුපුරන ද්‍රව්‍ය යොදා අල්ලන ලදැයි සැකකෙරෙන මෙම මත්ස්‍ය තොගය සොයාගෙන ඇති අතර, මෙම සිද්ධිය සම්බන්ධයෙන් පුදුකුඩිඉරිප්පු ප්‍රදේශයේ පදිංචි 38 වියැති කාන්තාවක් අත්අඩංගුවට ගෙන තිබේ.

අත්අඩංගුවට ගත් මත්ස්‍ය තොගය සහ සැකකාර කාන්තාව ඉදිරි නීතිමය කටයුතු සඳහා ධීවර හා ජලජ සම්පත් දෙපාර්තමේන්තුවේ මුලතිව් කාර්යාලය වෙත භාර දී තිබේ.