2023 ජූලි සහ 2026 ජූනි අතර කාලය තුළ බංග්ලාදේශයේ ඇඟලුම් කර්මාන්තශාලා අවම වශයෙන් 402ක් වැසී ගොස් ඇති බව බංග්ලාදේශ වාණිජ අමාත්‍ය ඛන්දකාර් අබ්දුල් මුක්තාදිර් පාර්ලිමේන්තුවට හෙළි කර සිටියි.

මෙලෙස වැසී ගිය කර්මාන්තශාලා අතුරින් 282ක් බංග්ලාදේශ ඇඟලුම් නිෂ්පාදකයන්ගේ සහ අපනයනකරුවන්ගේ සංගමයේ සාමාජිකයන් වන අතර, 120ක් බංග්ලාදේශ නිට්වෙයාර් නිෂ්පාදකයන්ගේ සහ අපනයනකරුවන්ගේ සංගමයට අයත් වේ.

කොවිඩ්-19 වසංගතය, රුසියා-යුක්‍රේන යුද්ධය, මැදපෙරදිග අර්බුදය, ඇමරිකා-ඉරාන ගැටුම්, ගෝලීය ආර්ථික පසුබැස්ම, දේශීය දේශපාලන අස්ථාවරත්වය සහ මුදල් විශුද්ධිකරණය නිසා ඇතිවූ බැංකු ක්ෂේත්‍රයේ ද්‍රවශීලතා අර්බුදය යන කරුණු මෙම කර්මාන්තශාලා වැසීයාමට ප්‍රධාන වශයෙන් බලපා ඇත.

මීට අමතරව ඉන්දියාව සහ වියට්නාමය විසින් යුරෝපය සමඟ ඇති කරගත් නිදහස් වෙළඳ ගිවිසුම් සහ විදෙස් ඇණවුම්කරුවන් කුඩා හා මධ්‍යම ප්‍රමාණයේ කර්මාන්තශාලාවලට ඇණවුම් ලබාදීම සීමා කිරීම ද මෙම තත්ත්වයට හේතු වී තිබේ.

මෙම අර්බුදයෙන් ගොඩ ඒම සඳහා බංග්ලාදේශ රජය විසින් අපනයන යොමු කළ රෙදිපිළි නිෂ්පාදකයන්ට 1.5%ක මුදල් ආධාර ක්‍රමවේදයක් ඇතුළු විවිධ බදු සහ සහන දීමනා රැසක් හඳුන්වා දී ඇත.

බංග්ලාදේශය අල්ප සංවර්ධිත රටක් තත්ත්වයේ සිට සංවර්ධනය වෙමින් පවතින රටක් බවට පත්වීමට නියමිත අතර, එමගින් ඩොලර් බිලියන 17.5ක අගයකින් යුත් අපනයන වෙළඳපොළ සහන අහිමි වීමේ අවදානමක් පවතී.

එම අවදානම මඟහරවා ගැනීම සඳහා ජපානය සමඟ ආර්ථික හවුල්කාරිත්ව ගිවිසුමක් අත්සන් කර ඇති අතර, දකුණු කොරියාව, යුරෝපා සංගමය, RCEP, එක්සත් අරාබි එමීර් රාජ්‍යය, සිංගප්පූරුව, ඉන්දුනීසියාව සහ චීනය සමඟ ද අලුත් වෙළඳ ගිවිසුම් සඳහා සාකච්ඡා පවත්වමින් සිටියි.