September 4, 2026
දෙහිවල ජාතික සත්වෝද්යානයේ සිටින 16 හැවිරිදි ‘බොම්’ නමැති මුහුදු සිංහයා පිළිකා රෝගයක් සඳහා සිදුකළ ශල්යකර්මයකින් පසුව මේ වන විට සුවය ලබමින් සිටින බව ජාතික සත්වෝද්යාන දෙපාර්තමේන්තුවේ අධ්යක්ෂ ජනරාල් චන්දන රාජපක්ෂ පවසයි.
මෙම මුහුදු සිංහයා සුවකිරීමට අපහසු තුවාලයකින් දීර්ඝ කාලයක් තිස්සේ පීඩා විඳි බවත්, සත්වෝද්යාන පශු වෛද්ය කණ්ඩායම විසින් සිදුකළ පරීක්ෂණවලදී එම තුවාලය පිළිකා තත්ත්වයක් හා සම්බන්ධ බව හෙළි වූ බවත් අධ්යක්ෂ ජනරාල්වරයා පැවසීය.
මෙම රෝග විනිශ්චයෙන් පසුව, කළ හැකි ප්රතිකාර ක්රම තීරණය කිරීම සඳහා දේශීය පශු වෛද්යවරුන් සහ විදේශීය විශේෂඥයන්ගෙන් උපදෙස් ලබාගෙන තිබේ.
මෙවැනි තත්ත්වයන්ට මුහුණ දෙන සතුන් ඇතැම් අවස්ථාවලදී සහන මරණයට ලක්කිරීමට සිදු වුවද, සත්වෝද්යාන කණ්ඩායම මුහුදු සිංහයාට ප්රතිකාර කිරීම සඳහා වෙනත් විකල්ප කෙරෙහි අවධානය යොමුකළ බව අධ්යක්ෂ ජනරාල්වරයා සඳහන් කළේය.
ඒ අනුව අදාළ ශල්යකර්මය සිදුකිරීමට හැකි විශේෂඥ පශු වෛද්යවරුන් හඳුනාගෙන, එම විශේෂඥයන්, දෙහිවල සත්වෝද්යානයේ පශු වෛද්යවරුන් සහ පේරාදෙණිය විශ්වවිද්යාලයේ විශේෂඥයන්ගෙන් සමන්විත කණ්ඩායමක් විසින් ශල්යකර්මය සිදුකිරීමට තීරණය කර ඇත.
මාස දෙකකට පමණ පෙර සත්වෝද්යාන සතුන්ගේ රෝහලේදී මෙම සැත්කම සාර්ථකව සිදුකර ඇති අතර, බොම් මේ වන විට සුවය ලබමින් සිටී.
“සත්වයා ක්රමයෙන් සුවය ලබමින් සිටිනවා. සපූර්ණ සුවය ලැබූ පසු, නැවතත් මුහුදු සිංහ දර්ශන සඳහා ඌව යොමුකිරීමට හැකිවනු ඇතැයි අපි බලාපොරොත්තු වෙනවා” යැයි අධ්යක්ෂ ජනරාල්වරයා පැවසීය.
පශු වෛද්ය කණ්ඩායම් විසින් සත්වයාගේ තත්ත්වය නිරන්තරයෙන් නිරීක්ෂණය කරමින් ප්රතිකාර ලබා දෙන බැවින් මෙම මුහුදු සිංහයා දැනට මහජන ප්රදර්ශනය සඳහා මුදාහැර නොමැත.
බොම් නැවත මහජන ප්රදර්ශනයට එක්කරන නිශ්චිත දිනයක් ප්රකාශ කළ නොහැකි වුවද, සත්වයාගේ සුවය ලැබීමේ ප්රගතිය මත එය සිදුවනු ඇතැයි ඔහු විශ්වාසය පළකළේය.
බොම්ගේ වයස අවුරුදු 16ක් පමණ වන අතර, එවැනි සතුන්ගේ ආයු කාලය අවුරුදු 20ක් පමණ වන බැවින් ඌ වයෝවෘද්ධ මුහුදු සිංහයකු ලෙස සැලකෙන බවද ඔහු සඳහන් කළේය.
සත්වෝද්යානවල සතුන් රඳවා තබාගැනීම සම්බන්ධයෙන් එල්ල වන විවේචනවලට පිළිතුරු දෙමින් අධ්යක්ෂ ජනරාල්වරයා පැවසුවේ, ජාතික සත්වෝද්යානය සත්ව සුභසාධනය, සංරක්ෂණය සහ අධ්යාපනය කෙරෙහි අවධානය යොමුකරන අතරම, තම පහසුකම් තුළ සතුන්ට උපරිම ඉඩකඩ සහ රැකවරණය ලබාදෙන බවයි.
විරල සත්ව විශේෂ සංරක්ෂණය කිරීම මෙන්ම සිසුන්ට සහ මහජනතාවට සතුන් සහ වනජීවී සංරක්ෂණය පිළිබඳව දැනුවත් වීමට අවස්ථාව සැලසීම සඳහාද සත්වෝද්යානය වැදගත් කාර්යභාරයක් ඉටු කරන බව ඔහු වැඩිදුරටත් පැවසීය.
