2026 ජූනි 30 වැනිදා විට ශ්‍රී ලංකාවේ මුළු රාජ්‍ය ණය ප්‍රමාණය ඇමෙරිකානු ඩොලර් බිලියන 97.952ක් (රුපියල් ට්‍රිලියන 32.977ක්) දක්වා ඉහළ ගොස් ඇති බව මුදල් අමාත්‍යාංශයේ රාජ්‍ය ණය කළමනාකරණ කාර්යාලය විසින් නිකුත් කරන ලද නවතම වාර්තාවේ සඳහන් වේ.

අදාළ වාර්තාවට අනුව 2026 ජූනි 30 වැනිදා විට රජයේ ණය ප්‍රමාණය පමණක් රුපියල් ට්‍රිලියන 31.999ක් හෙවත් ඇමෙරිකානු ඩොලර් බිලියන 95.047ක් වේ.

මීට අමතරව, පළාත් සභා සහ පළාත් ආයතන මගින් ලබාගෙන ඇති ණය ප්‍රමාණය ඩොලර් මිලියන 20ක් වන අතර, රජයේ ඇපකර මත රාජ්‍ය ව්‍යවසායයන් ලබාගෙන ඇති ණය ප්‍රමාණය ඩොලර් බිලියන 2.885ක් ලෙස සටහන් වේ.

දේශීය ණය රුපියල් ට්‍රිලියන 19කි

එම වාර්තාවට අනුව, ජූනි මාසය අවසන් වන විට මධ්‍යම රජයේ දේශීය ණය ප්‍රමාණය ඇමෙරිකානු ඩොලර් බිලියන 57.039ක් හෙවත් රුපියල් ට්‍රිලියන 19.203ක් විය.

එම මුදලින්, ඩොලර් බිලියන 47.732ක් (රුපියල් ට්‍රිලියන 16.069ක්) ගෙවීමට ඇති භාණ්ඩාගාර බැඳුම්කර වන අතර, ගෙවීමට ඇති භාණ්ඩාගාර බිල්පත් ප්‍රමාණය ඩොලර් බිලියන 7.045ක් (රුපියල් ට්‍රිලියන 2.372ක්) වේ.

විදේශ ණය ඩොලර් බිලියන 38 ඉක්මවයි

ජූනි මාසය අවසන් වන විට මධ්‍යම රජයේ විදේශ ණය ප්‍රමාණය ඇමෙරිකානු ඩොලර් බිලියන 38.008ක් ලෙස සටහන් විය.

2026 පළමු කාර්තුව අවසානයේ ඩොලර් බිලියන 37.468ක් ලෙස පැවති රජයේ විදේශ ණය ප්‍රමාණය, දෙවන කාර්තුව අවසන් වන විට ඩොලර් මිලියන 540ක වැඩිවීමක් පෙන්වමින් ඩොලර් බිලියන 38.008ක් දක්වා ඉහළ ගොස් ඇති බව වාර්තාව පෙන්වාදෙයි.

මෙම විදේශ ණය සඳහා බහුපාර්ශ්වික ණය ඩොලර් බිලියන 14.802ක්, වාණිජ ණය ඩොලර් බිලියන 12.409ක් සහ ද්විපාර්ශ්වික ණය ඩොලර් බිලියන 10.797ක් ඇතුළත් වේ.

ද්විපාර්ශ්වික ණයහිමියන් අතර චීනය පෙරමුණේ

රාජ්‍ය ණය කළමනාකරණ කාර්යාලය නිකුත් කළ වාර්තාවේ වැඩිදුරටත් සඳහන් වන්නේ, ද්විපාර්ශ්වික ණය හිමියන් අතුරින් ශ්‍රී ලංකාව චීනයට ඩොලර් බිලියන 5.0067ක ණය මුදලක් ගෙවීමට ඇති බවයි.

මීට අමතරව, ශ්‍රී ලංකාව ජපානයට ඩොලර් බිලියන 2.2727ක් සහ ඉන්දියාවට ඩොලර් මිලියන 853.9ක් ගෙවීමට ඇති බවද වාර්තාවේ සඳහන් වේ.

බහුපාර්ශ්වික ණය

බහුපාර්ශ්වික ණය හිමියන් අතුරින් ගෙවීමට ඇති ණය ප්‍රමාණයන් වන්නේ ආසියානු සංවර්ධන බැංකුවට (ADB) ඩොලර් බිලියන 6.8851ක්, ලෝක බැංකුවට ඩොලර් බිලියන 4.6662ක් සහ අන්තර්ජාතික මූල්‍ය අරමුදලට (IMF) ඩොලර් බිලියන 2.6152ක් වශයෙනි.

අන්තර්ජාතික ස්වෛරී බැඳුම්කර යටතේ ඩොලර් බිලියන 10කි

ශ්‍රී ලංකාවේ බාහිර වාණිජ ණය ප්‍රමාණය ඩොලර් බිලියන 12.4091ක් වන අතර, එයින් ඩොලර් බිලියන 10.0071ක්ම පවතින්නේ අන්තර්ජාතික ස්වෛරී බැඳුම්කර (ISBs) යටතේ බව වාර්තාව පවසයි.

තවත් ඩොලර් බිලියන 2.402ක වාණිජ ණයක් චීනයට අදාළ ආසියානු සංවර්ධන බැංකු වාරික ණය පහසුකම් යටතේ පවතී. 2024 වසරේ සිදු කරන ලද ණය ප්‍රතිප්‍රතිසංස්කරණයෙන් පසුව නිකුත් කරන ලද නව ස්වෛරී බැඳුම්කර කල්පිරීමේ කාලසීමාවන් 2028 සිට 2038 දක්වා වන බවද එහි සඳහන් වේ.

දෙවැනි කාර්තුවේදී ණය සේවාකරණය සඳහා රුපියල් බිලියන 2,698.6ක්

මෙම වසරේ දෙවන කාර්තුව තුළ රජයේ මුළු ණය සේවාකරණ ගෙවීම් (ණය සහ පොලී ගෙවීම්) ප්‍රමාණය රුපියල් බිලියන 2,698.6ක් වූ බව වාර්තාවේ වැඩිදුරටත් දැක්වේ.

එයින් රුපියල් බිලියන 2,441.6ක් පොලී ගෙවීම් ඇතුළුව දේශීය ණය සඳහා ගෙවා ඇති අතර, රුපියල් බිලියන 257.0ක් විදේශ ණය සඳහා ගෙවා ඇත.

විදේශ ණය ගෙවීම් ඩොලර්වලින් සැලකීමේදී, ණය වාරික ලෙස ඩොලර් මිලියන 573.9ක් සහ පොලී ලෙස ඩොලර් මිලියන 230.4ක් ගෙවා ඇති අතර, ඒ අනුව මුළු බාහිර ණය සේවාකරණ ගෙවීම ඩොලර් මිලියන 804.3කි.

ණය ප්‍රතිව්‍යුහගතකරණය කිරීම තවමත් සම්පූර්ණයෙන්ම අවසන් නැත

ශ්‍රී ලංකාවේ ණය ප්‍රතිව්‍යුහගතකරණය කිරීමේ ක්‍රියාවලිය සම්බන්ධයෙන්ද වැදගත් තොරතුරු රැසක් මෙම වාර්තාව මගින් අනාවරණය කර ඇත.

වාර්තාවට අනුව, නිල ණය හිමියන්ගේ කමිටුව (OCC), චීන එක්සිම් බැංකුව (China Exim Bank), චීන සංවර්ධන බැංකුව (China Development Bank) සහ ප්‍රතිව්‍යුහගතකරණය ස්වෛරී බැඳුම්කර හිමියන් සමඟ ණය ප්‍රතිව්‍යුහගතකරණය කිරීමේ ප්‍රධාන පියවර කිහිපයක් ශ්‍රී ලංකාව විසින් අවසන් කර ඇත.

අන්තර්ජාතික ස්වෛරී බැඳුම්කර හුවමාරුව 2024 දෙසැම්බර් මාසයේදී සාර්ථකව අවසන් වූ අතර ඊට 98%ක පමණ දායකත්වයක් හිමිවූ බව එහි දැක්වේ.

මීට අමතරව, ජපානය, ඉන්දියාව, ප්‍රංශය, හංගේරියාව, සෞදි අරාබිය, එක්සත් රාජධානිය, ඕස්ට්‍රේලියාව, ඩෙන්මාර්කය, බෙල්ජියම සහ ජර්මනිය ඇතුළු රටවල් සමඟ ද්විපාර්ශ්වික ණය ප්‍රතිව්‍යුහගතකරණය කිරීමේ ගිවිසුම් සම්බන්ධයෙන් පියවර ගෙන ඇති අතර, එම අදාළ ගිවිසුම් යටතේ එම රටවල් වෙත සාමාන්‍ය පරිදි ණය සේවාකරණ කටයුතු නැවත ආරම්භ කර තිබේ.

කෙසේවෙතත්, තවත් රටවල් 13කට ගෙවීමට ඇති ණය සේවාකරණයට අදාළ ණය ප්‍රතිව්‍යුහගතකරණය කිරීමේ කටයුතු තවමත් සිදුවෙමින් පවතින බවද එම වාර්තාවේ වැඩිදුරටත් සඳහන් වේ.