ලෝක කුසලාන අවසන් මහා තරගයේදී ස්පාඤ්ඤ ක්‍රීඩකයන්ට පහරදීමේ සිදුවීම සම්බන්ධයෙන් ආර්ජන්ටිනා ක්‍රීඩකයන් තිදෙනෙකුට තරග තහනම් සහ දඩ පැනවීමට අන්තර්ජාතික පාපන්දු සම්මේලනය (FIFA) පියවර ගෙන ඇත.

ස්පාඤ්ඤය හමුවේ අතිරේක කාලයේදී ගෝල 1-0ක් ලෙස පරාජය වීමෙන් පසු ඇතිවූ මෙම උණුසුම් තත්ත්වය මත පදනම්ව FIFA විනය කමිටුව මෙම තීරණය ගෙන තිබේ.

ලියැන්ඩ්‍රෝ පරේඩෙස්ට ස්පාඤ්ඤයේ එරික් ගාර්සියාගේ ගෙල මිරිකා, ගාවි බිමට තල්ලු කිරීමේ චෝදනාව මත ඔහුට තරග 10ක තහනමක් සහ ඇමෙරිකානු ඩොලර් 90,000ක දඩයක් පනවා ඇත.

මෙය 2027 ජූනි දක්වා වසරක කාලයක් ආර්ජන්ටිනා කණ්ඩායම නියෝජනය කිරීම අහිමි වීමකි.

නහුවෙල් මොලීනාට තරග 7ක තහනමක් සහ ඇමෙරිකානු ඩොලර් 90,000ක දඩයක් පනවා තිබේ.

තියාගෝ අල්මාඩාට එක් තරගයක තහනමක් සහ ඇමෙරිකානු ඩොලර් 30,000ක දඩයක් නියම කර ඇත.

ස්පාඤ්ඤයේ ගාවි ද සිද්ධියට සම්බන්ධ වීම නිසා එක් තරග තහනමකට මුහුණ දී සිටී.

ආර්ජන්ටිනා සහාය පුහුණුකරු වන රොබර්ටෝ අයාපා හට තරග 3ක තහනමක් සහ ඇමෙරිකානු ඩොලර් 30,000ක දඩයක් පනවා තිබේ.

ෆෝක්ලන්ඩ් දූපත් සම්බන්ධයෙන් දේශපාලනික බැනරයක් ප්‍රසංගනය කිරීම සහ ප්‍රේක්ෂකයන්ගේ වාර්ගික අපහාසාත්මක හැසිරීම් හේතුවෙන් ආර්ජන්ටිනා පාපන්දු සංගමයට ඇමෙරිකානු ඩොලර් 110,000ක දඩයක් පනවා ඇති අතර, ජාතිවාදයට එරෙහි ව්‍යාපෘති සඳහා ඩොලර් 100,000ක් වැය කිරීමට නියෝග කර ඇත.

ඊට අමතරව ඉදිරි ගෘහස්ථ තරගයේදී ක්‍රීඩාංගණයේ ප්‍රේක්ෂක ධාරිතාව 50% දක්වා සීමා කිරීමට ද නියෝග කර තිබේ.

මෙම දීර්ඝ කාලීන තහනම් තීරණවලට එරෙහිව FIFA අභියාචනා කමිටුවට සහ ක්‍රීඩා තීරක අධිකරණයට අභියාචනා කිරීමට ආර්ජන්ටිනා පාපන්දු සංගමය තීරණය කර ඇත.