ශ්‍රේෂ්ඨාධිකරණය සහ අභියාචනාධිකරණය විනිසුරුවරුන්ගේ විශ්‍රාම යන වයස දීර්ඝ කිරීම සඳහා වූ රජයේ යෝජනාවේ කොටසක් ලෙස ඊයේ (එනම් මෙම පනත් කෙටුම්පත සභාවට ඉදිරිපත් කළ දිනයේ) පාර්ලිමේන්තුවට ඉදිරිපත් කරන ලද 22 වැනි ආණ්ඩුක්‍රම ව්‍යවස්ථා සංශෝධනයට එරෙහිව ශ්‍රේෂ්ඨාධිකරණය හමුවේ පෙත්සම් කිහිපයක් ගොනුකර ඇත.

22 වැනි ආණ්ඩුක්‍රම ව්‍යවස්ථා සංශෝධනයට සහ යෝජිත අධිකරණ සංවිධාන පනත් සංශෝධනයට එරෙහිව පෙත්සම් ගොනුකිරීම සඳහා වූ දින 14 ක කාලසීමාව, එම පනත් කෙටුම්පත් පාර්ලිමේන්තුවට ඉදිරිපත් කිරීමත් සමඟ ඊයේ(18) සිට ආරම්භ විය.

පනත් කෙටුම්පත පාර්ලිමේන්තු න්‍යාය පත්‍රයට ඇතුළත් කර පැය කිහිපයක් ඇතුළත, ශ්‍රී ලංකා නීතිඥ සංගමය විසින් 22 වැනි සංශෝධනය අභියෝගයට ලක්කරමින් ශ්‍රේෂ්ඨාධිකරණය හමුවේ පෙත්සමක් ගොනුකරන ලදී.

ඊයේ දිනයේ පෙත්සම් ගොනුකළ අනෙකුත් පාර්ශ්වයන් අතර ස්වාධීන නීතිඥ සංගමයේ සභාපති ජනාධිපති නීතිඥ මෛත්‍රී ගුණරත්න, සර්වජන බලය, සමගි ජන බලවේගය සහ හිටපු අමාත්‍ය මහාචාර්ය ජී. එල්. පීරිස් යන පාර්ශ්ව වෙති.

මෙම පෙත්සම්වල වගඋත්තරකරු ලෙස නීතිපතිවරයා නම්කර ඇත.

යෝජිත 22 වැනි සංශෝධනය ආණ්ඩුක්‍රම ව්‍යවස්ථාවට පටහැණි බවත්, එය සම්මත කිරීමට නම් පාර්ලිමේන්තුවේ තුනෙන් දෙකක විශේෂ බහුතරයකින් මෙන්ම ජනමත විචාරණයකින් ද අනුමත විය යුතු බවට තීන්දුවක් ලබා දෙන ලෙස පෙත්සම්කරුවෝ ශ්‍රේෂ්ඨාධිකරණයෙන් ඉල්ලා සිටිති.