දේශීය ඉල්ලුම පහත වැටීම සහ අයහපත් කාලගුණය ආර්ථිකයේ ඉදිරි ගමනට බාධා කරයි

ජාතික සංඛ්‍යාලේඛන කාර්යාංශය සඳහන් කළ දත්තවලට අනුව, පසුගිය ජූලි මාසයේදී චීනයේ කාර්මික නිෂ්පාදනය පෙර වසරේ සමාන කාලපරිච්ඡේදයට සාපේක්ෂව සියයට 4.5ක වර්ධනයක් වාර්තා කර ඇත.

මෙය ගතවූ මාස තුනක කාලය තුළ කාර්මික නිෂ්පාදන වර්ධන වේගය මන්දගාමී වූ පළමු අවස්ථාව ලෙස සටහන් වේ.

Bloomberg ආයතනය විසින් සිදුකරන ලද ආර්ථික විද්‍යාඥ සමීක්ෂණයකදී පුරෝකථනය කර තිබුණේ සියයට 5ක වර්ධනයකි.

එමෙන්ම, ජූලි මාසයේ සිල්ලර අලෙවි වර්ධනයද අපේක්ෂිත මට්ටමට වඩා අඩුවෙමින් සියයට 0.6 දක්වා පහත වැටී තිබේ.

ස්ථාවර වත්කම් ආයෝජන වසරේ මුල් මාස හත තුළදී පෙර වසරට සාපේක්ෂව සියයට 6.7කින් පහත වැටී ඇති අතර, එයද පුරෝකථනය කරන ලද මට්ටමට වඩා වැඩි අගයකි. වසරේ මුල් මාස හය තුළදී මෙම අගය සටහන් වූයේ සියයට 5.7ක පහත වැටීමක් ලෙසයි.

මීට අමතරව, නාගරික රැකියා විරහිතභාවය පිළිබඳ සමීක්ෂණ දත්තවලට අනුව ජූනි මාසයේදී සියයට 5ක්ව පැවැති නාගරික රැකියා විරහිතතා අනුපාතය ජූලි මාසයේදී සියයට 5.2 දක්වා ඉහළ ගොස් ඇත.

මෙම වසරේ මේ දක්වා කාලය තුළ සමස්ත ආර්ථිකය ස්ථාවර මට්ටමක පැවැති බව චීනයේ ජාතික සංඛ්‍යාලේඛන කාර්යාංශය පවසයි.

කෙසේ වෙතත්, බාහිර ගෝලීය පරිසරය සංකීර්ණ මෙන්ම අවිනිශ්චිත ස්වභාවයක් ගන්නා බවත්, දේශීය ඉල්ලුම තවදුරටත් මන්දගාමී මට්ටමක පවතින බවත් එම කාර්යාංශය පෙන්වා දෙයි.

දත්ත වාර්තාව නිකුත් කරමින් නිකුත් කළ නිවේදනයේ වැඩිදුරටත් සඳහන් වන්නේ, ඇතැම් ව්‍යාපාරික ආයතන මෙහෙයුම් කටයුතුවලදී දුෂ්කරතාවලට මුහුණ දෙමින් සිටින අතර, ආර්ථිකය ස්ථාවර කරගැනීමට සහ වර්ධනය කරගැනීමට අවශ්‍ය පදනම තවදුරටත් ශක්තිමත් කළ යුතුව තිබෙන බවයි.

මාස ගණනාවක් තිස්සේ ක්‍රියාත්මක වූ දැඩි රාජ්‍ය වියදම් සීමා කිරීම් හේතුවෙන් දැනටමත් දුර්වල වී ඇති ආර්ථිකයට, අඩාල වූ දේශීය ඉල්ලුම සහ අයහපත් කාලගුණික තත්ත්වයන් නිසා ඇති වූ බලපෑම් තවදුරටත් අභියෝගයක් වී තිබේ.

අපනයන ක්ෂේත්‍රයේ කැපී පෙනෙන වර්ධනයක් පැවැතියද, දෙවැනි කාර්තුවේ ආර්ථික වර්ධනය රජයේ වාර්ෂික ඉලක්කය වූ සියයට 4.5 – 5 මට්ටමට වඩා පහත වැටී ඇත.

අගෝස්තු මාසයේ ආරම්භයේදී මෙම ආර්ථික ගම්‍යතාව තවදුරටත් මන්දගාමී වී ඇති බව බ්ලූම්බර්ග් ඉකොනොමික්ස් (Bloomberg Economics) පුරෝකථනය කරයි.