මහජන නියෝජිතයන් නොමැතිව පළාත් සභා තවදුරටත් ක්‍රියාත්මක වීම ප්‍රජාතන්ත්‍රවාදී ප්‍රතිපත්ති උල්ලංඝනය කිරීමක් බව හිටපු මැතිවරණ කොමසාරිස් මහින්ද දේශප්‍රිය ප්‍රකාශ කරයි.

ජනමාධ්‍ය ඇමතූ මහින්ද දේශප්‍රිය කියාසිටියේ, පළාත් සභා පරිපාලනමය වශයෙන් පවත්වාගෙන යා හැකි බවට ඇතැම් පිරිස් තර්ක කළද, “මහජන නියෝජිත සංවිධානයක් මහජන නියෝජිතයන් නොමැතිව පවත්වාගෙන යාම අපරාධයක්” බවයි.

පළාත් සභා මන්ත්‍රීවරුන් නොමැතිව පවත්වාගෙන යාමට ඉඩදුන හොත්, එම තර්කයම පාර්ලිමේන්තුවට සහ පළාත් පාලන ආයතනවලටත් අදාළ විය හැකි බවත්, එමගින් නියෝජිත ප්‍රජාතන්ත්‍රවාදයේ පදනමම දුර්වල වන බවත් ඔහු අනතුරු ඇඟවීය.

නිලධාරීන් මහජනතාවට සෘජුවම වගකියනු නොලබන බැවින්, තේරී පත් වූ මහජන නියෝජිතයන් වෙනුවට නිලධාරීන් ආදේශ කළ නොහැකි බව ඔහු අවධාරණය කළේය.

සැප්තැම්බර් 15 වන දිනට යෙදෙන ලෝක ප්‍රජාතන්ත්‍රවාදී දිනයේදී මේ පිළිබඳ වැඩිදුර තොරතුරු හෙළිදරව් කරන බව ප්‍රකාශ කළ දේශප්‍රිය මහතා, දීර්ඝ කාලයක් තිස්සේ ප්‍රමාද වී ඇති පළාත් සභා මැතිවරණය පැවැත්වෙන ආකාරය සහ දිනය රජය විසින් ඒ වන විට නිවේදනය කරනු ඇතැයි බලාපොරොත්තු වන බවද පැවසීය.