නීතිවිරෝධී මූල්‍ය ගනුදෙනු සිදුකිරීම සහ මුදල් විශුද්ධිකරණය (ලොන්ඩරින්) යන චෝදනා මත වැඩතහනම් කරන ලද පොලිස් උප පරීක්ෂකවරයකු අල්ලස් හෝ දූෂණ විමර්ශන කොමිෂන් සභාව විසින් අත්අඩංගුවට ගෙන ඇත.

මෙහොට්ටි ආරච්චිගේ ලහිරු ප්‍රමෝද් නමැති මෙම සැකකරු බදාදා (30) පස්වරු 12.45 ට පමණ සිය විමර්ශකයන් විසින් අත්අඩංගුවට ගත් බව අල්ලස් කොමිසම පැවසීය.

කොමිෂන් සභාවට අනුව, සැකකරු උපපොලිස් පරීක්ෂකවරයකු ලෙස සේවය කරමින් සිටියදී අපරාධ චෝදනාවලට ලක්වූ සැකකරුවන්, පැමිණිලිකරුවන්, විත්තිකරුවන් සහ වරදකරුවන් වූ පුද්ගලයන් සමඟ සබඳතා පවත්වාගෙන ගොස් ඇති අතර, බැංකු ගිණුම් හරහා නීතිවිරෝධී මූල්‍ය ගනුදෙනුවල නිරත වෙමින් එම මුදල් විශුද්ධිකරණය කර ඇති බවට චෝදනා එල්ල වී තිබේ.

සැකකරු කොළඹ මහේස්ත්‍රාත් අධිකරණය හමුවට ඉදිරිපත් කිරීමට නියමිත බව අල්ලස් හෝ දූෂණ විමර්ශන කොමිෂන් සභාව වැඩිදුරටත් සඳහන් කළේය.