ප්‍රධාන පාපන්දු තරගාවලිවල කොටස් පෞද්ගලික ආයෝජකයන් වෙත විකිණීමට අන්තර්ජාතික පාපන්දු සම්මේලනය (FIFA) සූදානම් වන්නේ නම්, එම තරගාවලි වර්ජනය කිරීමට යුරෝපීය පාපන්දු සම්මේලනයට (UEFA) අයත් සාමාජික සංගම් 55ම ඒකමතිකව තීරණය කර ඇත.

FIFA සභාපති ජියානි ඉන්ෆැන්ටිනෝ විසින් FIFA ලෝක කුසලානය, කාන්තා ලෝක කුසලානය සහ විජයග්‍රාහී ක්ලබ් ලෝක කුසලානය වැනි තරගාවලි පාලනය කිරීම සඳහා වාණිජ අනුබද්ධ ආයතනයක් පිහිටුවීමට ඉදිරිපත් කළ යෝජනාව සාකච්ඡා කිරීමට කැඳවූ හදිසි UEFA හමුවකදී මෙම තීරණයට එළඹ තිබේ.

එම යෝජනාවට අනුව, අලුතින් පිහිටුවන වාණිජ ආයතනයේ සුළුතර කොටස් මිලදී ගැනීමට බාහිර ආයෝජකයන්ට හැකියාව ලැබෙනු ඇත. මෙම සැලැස්මට සහාය පළ කරන්නේ නම් FIFA සාමාජික සංගම් 211 වෙත ඇමෙරිකානු ඩොලර් මිලියන 40 දක්වා මුදලක් ලැබෙනු ඇති බවත්, සැප්තැම්බර් 19 වන දිනට පෙර යෝජනාව අනුමත කරන සංගම්වලට ප්‍රථම අදියර ලෙස ඩොලර් මිලියන 20 ක මුදලක් ලබාගත හැකි බවත් ඉන්ෆැන්ටිනෝ පවසා ඇති බව වාර්තා වේ.

රැස්වීමෙන් අනතුරුව නිවේදනයක් නිකුත් කරමින් UEFA සඳහන් කළේ, සිය සාමාජික සංගම් 55 ‘එක්සත්ව සිටින’ බවත්, ලෝක කුසලානය සහ අනෙකුත් FIFA තරගාවලිවල හිමිකාරීත්ව කොටස් පෞද්ගලික ආයෝජකයින්ට පැවරීමට FIFA ඉදිරිපත් කළ යෝජනාව “ඒකමතිකව සහ පැහැදිලිවම ප්‍රතික්ෂේප කරන” බවත්ය.

“ලෝක කුසලානය ආයෝජන භාණ්ඩයක් ලෙස සැලකිය නොහැකියි. එය පාපන්දු ක්‍රීඩාවේ ශ්‍රේෂ්ඨතම ක්‍රීඩා උරුමයන්ගෙන් එකක්. එහි කිසිදු කොටසක් පෞද්ගලික ආයෝජකයන්ට යටත් නොකළ යුතුයි. ලෝක කුසලානය විකිණීමට නැත” යැයි එම නිවේදනයේ වැඩිදුරටත් දැක්වේ.

මෙම යෝජිත වර්ජනය සඳහා පිරිමි සහ කාන්තා ලෝක කුසලාන සහ ක්ලබ් ලෝක කුසලාන ඇතුළු සියලුම FIFA තරගාවලි ඇතුළත් වන නමුත්, එය ක්‍රියාත්මක වන්නේ ඉදිරි ඡන්ද විමසීමකදී FIFA සාමාජික සංගම් මෙම ආයෝජන යෝජනාව අනුමත කළහොත් පමණි.