එක්සත් ජනපදය සහ ඊශ්‍රායලය සමඟ පවතින උග්‍ර යුදමය තත්ත්වය හමුවේ බිඳවැටී ඇති ගුවන් ආරක්ෂණ පද්ධති නැවත බලගැන්වීම සඳහා චීනයෙන් නිපදවන ලද උරහිස මත තබා විදිය හැකි ‘මෑන්පෑඩ්ස්’ (MANPADS) වර්ගයේ ගුවන් ආරක්ෂක මිසයිල විදින පද්ධති 400ක් පමණ ලබාගැනීමට ඉරානය සූදානම් වන බව වාර්තා වේ.

ඇමෙරිකානු ඩොලර් මිලියන 60-70 අතර වටිනාකමකින් යුත් මෙම ගිවිසුම යටතේ චීනයේ නිෂ්පාදිත QW-12 සහ FN-16 වර්ගයේ මිසයිල පද්ධති 300ත් 400ත් අතර ප්‍රමාණයක් ඉදිරි සති කිහිපය තුළ ඉරානය වෙත ලැබීමට නියමිතය.

හොංකොං හි ලියාපදිංචි සමාගමක් හරහා මෙම ගිවිසුම අත්සන් කර ඇති අතර, මෙලෙස කෙටි දුර ගුවන් ආරක්ෂණ පද්ධති විශාල ප්‍රමාණයක් මිලදී ගැනීම මෑත කාලයේ ඉරානය විසින් සිදුකළ විශාලතම ආයුධ ගනුදෙනුවක් ලෙස සැලකේ.

පසුගිය මාස කිහිපය තුළ ඇමෙරිකානු සහ ඊශ්‍රායල ප්‍රහාර හමුවේ ඉරානයේ සක්‍රීය හමුදා කඳවුරු සහ උපායමාර්ගික ස්ථාන රැසකට දැඩි හානි සිදු විය.

මෙම පද්ධති මගින් පහළින් පියාසර කරන ප්‍රහාරක යානා, හෙලිකොප්ටර් සහ ඩ්‍රෝන යානා පහසුවෙන් විනාශ කළ හැකි අතර, ඒවා ඕනෑම ස්ථානයකට පහසුවෙන් ගෙන යා හැකි වීම විශේෂත්වයකි.

මෙම මිසයිල පාකිස්ථානය හරහා ගොඩබිමින් හෝ ගුවනින් ඉරානය වෙත ප්‍රවාහනය කිරීමට සැලසුම් කර ඇති බව වාර්තා වුවද, පාකිස්ථාන හමුදාව එම ප්‍රකාශ සම්පූර්ණයෙන්ම ප්‍රතික්ෂේප කර තිබේ.

එමෙන්ම චීන විදේශ අමාත්‍යාංශයද මෙම පුවත පදනම් විරහිත බව ප්‍රකාශ කරමින් කියා සිටියේ තමන් කලාපයේ ප්‍රගතිය වෙනුවෙන් පෙනී සිටින බවයි.