දකුණු චීන මුහුදේ පිහිටි මතභේදාත්මක කොරල් පරයක් ආසන්නයේදී සිය රජයේ යාත්‍රා වෙත චීන වෙරළාරක්ෂක බලකාය දෙවන දිනටත් ජල ප්‍රහාර එල්ල කළ බවට ෆිලිපීන වෙරළාරක්ෂක බලකාය චෝදනා කළේය. මෙය මෙම සතිය තුළ දෙරට අතර ඇති වූ තෙවන මුහුණට මුහුණ ලා සිදුවූ නොසන්සුන්කාරී සිදුවීමයි.

පිලිපීනයේ සුවිශේෂී ආර්ථික කලාපය තුළ පිහිටි ස්කාර්බරෝ කොරල් පරය ආසන්නයේදී චීන යාත්‍රාවක්, ෆිලිපීන ධීවර යාත්‍රාවකට මීටර් 7ක් තරම් ආසන්නයට පැමිණි බවත්, එමගින් බරපතල අනතුරක් සිදුවීමේ අවදානමක් මතු වූ බවත් එම බලකාය සඳහන් කරයි.

“චීන වෙරළාරක්ෂක බලකායේ මෙම අනතුරුදායක ක්‍රියාකලාපය පිලිපීන වෙරළාරක්ෂක බලකාය දැඩි ලෙස හෙළා දකිනවා,” යනුවෙන් එහි මාධ්‍ය ප්‍රකාශක ජේ තාරියෙලා නිවේදනයක් නිකුත් කරමින් පැවසීය.

මෙම ප්‍රදේශය පිලිපීන ධීවරයන්ගේ පාරම්පරික ධීවර භූමියක් බවත්, ඔවුන්ගේ අයිතිවාසිකම්වලට බාධා කිරීමට කිසිදු විදේශීය බලවේගයකට නීත්‍යානුකූල අවසරයක් නොමැති බවත් ඔහු වැඩිදුරටත් අවධාරණය කළේය.

කෙසේ වෙතත්, ස්කාර්බරෝ කොරල් පරය ආශ්‍රිත මුහුදු සීමාවේ නීතිවිරෝධී ලෙස ධීවර කටයුතුවල නිරත වූ පිලිපීන යාත්‍රා කිහිපයකට එරෙහිව පාලන පියවර ගත් බව චීන වෙරළාරක්ෂක බලකාය පැවසීය.