රුපියල් 630,000ක් පමණ වටිනා විදේශීය නිෂ්පාදිත සිගරට් තොගයක් නීතිවිරෝධී ලෙස රට තුළට ගෙන ඒමට උත්සාහ කළ චීන ජාතිකයකු රේගු නිලධාරීන් විසින් අද (25) බණ්ඩාරනායක අන්තර්ජාතික ගුවන්තොටුපළේදී අත්අඩංගුවට ගෙන ඇත.

අත්අඩංගුවට ගත් සැකකරු 40 හැවිරිදි චීන ජාතිකයකු ලෙස හඳුනාගෙන ඇති බව රේගු නිලධාරීහු පැවසූහ.

ප්‍රකාශ කිරීමට කිසිවක් නොමැති මගීන් සඳහා වෙන්කර ඇති ‘හරිත තීරුව’ (Green Channel) ඔස්සේ පිටව යෑමට උත්සාහ කිරීමේදී සැකකරු අත්අඩංගුවට ගත් බව නිලධාරීන්ට අනුව වාර්තා වේ.

ඔහු අද අලුයම 12.55 ට මැලේසියාවේ කුවාලලම්පූර් සිට එයාර් ඒෂියා සේවයට අයත් AK 047 ගුවන් යානයෙන් කටුනායක ගුවන්තොටුපළ වෙත පැමිණ තිබේ.

පරීක්ෂා කිරීමේදී, සැකකරු සතු වූ ගමන් බෑග දෙකක් තුළ සඟවා තිබූ විදේශීය නිෂ්පාදිත සිගරට් 40,200ක් ඇතුළත් කාටන් 201ක් සොයාගැනීමට රේගු නිලධාරීන් සමත් වූ බව වාර්තා සඳහන් කරයි.

සැකකාර චීන ජාතිකයා කටුනායක ගුවන්තොටුපළ රේගු නිලධාරීන් භාරයේ රඳවාගෙන ඇති අතර සිද්ධිය සම්බන්ධයෙන් වැඩිදුර පරීක්ෂණ ක්‍රියාත්මක වේ.