සිරස් අතට ගුවන්ගත විය හැකි සහ ගොඩබැසිය හැකි (VTOL) ගුවන් යානා නිෂ්පාදනය කිරීමේ පහසුකම් සහිත නිෂ්පාදනාගාරයක් ශ්‍රී ලංකාවේ පිහිටුවීම සඳහා ‘Seahorse Air Ceylon’ නමැති ශ්‍රී ලාංකික නවමු ව්‍යාපාරය විසින් යෝජනාවක් ඉදිරිපත් කර ඇත.

නැඟී එන උසස් ගුවන් ගමනාගමන (Advanced Air Mobility – AAM) ක්ෂේත්‍රය ඉලක්ක කර ගනිමින් ගුවන් යානා නිෂ්පාදන හැකියාවන් වර්ධනය කිරීමේ සැලසුම් පැහැදිලි කිරීම සඳහා එම සමාගමේ නියෝජිතයෝ සිවිල් ගුවන් සේවා අධිකාරියේ අධ්‍යක්ෂ ජෙනරාල් සහ ප්‍රධාන විධායක නිලධාරී, කප්පිතාන් දමින්ද රඹුක්වැල්ල හමුව ඇති බව Newswire.lk වාර්තා කරයි.

සිවිල් ගුවන් සේවා අධිකාරියට අනුව, Seahorse Air Ceylon සමාගම ශ්‍රී ලංකා ආයෝජන මණ්ඩලයේ ලියාපදිංචි වී ඇති අතර, මෙම ව්‍යාපෘතියේ පර්යේෂණ, සංවර්ධන සහ පරීක්ෂණ අදියර ආරම්භ කිරීම සඳහා අවශ්‍ය නියාමන අනුමැතිය ලබා ගැනීමට මේ වන විට කටයුතු කරමින් සිටියි.

මෙම හමුවේදී, ජාතික හා අන්තර්ජාතික ගුවන් සේවා ප්‍රමිතීන්ට අනුකූලව ව්‍යාපෘතියේ මූලික අදියරවලදී සපිරිය යුතු නියාමන රාමුව, සහතික කිරීමේ ක්‍රියාවලිය සහ ගුවන් සේවා ආරක්ෂණ අවශ්‍යතා පිළිබඳව සිවිල් ගුවන් සේවා අධිකාරියේ නිලධාරීන් විසින් කරුණු පැහැදිලි කර ඇත.

මෙම යෝජිත ව්‍යාපෘතිය මගින් ශ්‍රී ලංකාවේ ගුවන් සේවා කර්මාන්තයේ දියුණුවට සහ වේගයෙන් වර්ධනය වන උසස් ගුවන් ගමනාගමන ක්ෂේත්‍රයට ශ්‍රී ලංකාවේ දායකත්වය ලබා ගැනීමට වැඩි ඉඩකඩක් පවතින බව සිවිල් ගුවන් සේවා අධිකාරිය පවසයි.

VTOL ගුවන් යානා යනු සාම්ප්‍රදායික ගුවන්තොටුපළ ධාවන පථවල අවශ්‍යතාව අඩු කරමින්, සිරස් අතට ගුවන්ගත වීමට සහ ගොඩබැසීමට හැකි වන පරිදි නිර්මාණය කර ඇති යානා වර්ගයකි.

කෙටි දුර මගී ප්‍රවාහනය ඇතුළු වෙනත් ගුවන් ගමනාගමන සේවාවන් සඳහා අන්තර්ජාතිකව මෙම තාක්ෂණය භාවිත කිරීම කෙරෙහි වැඩි අවධානයක් යොමුවෙමින් පවතී.