යාපනය දිස්ත්‍රික් පාර්ලිමේන්තු මන්ත්‍රී රාමනාදන් අර්චුනා පාර්ලිමේන්තු රැස්වීමට සහභාගී වී සිටියදී ඔහුට එරෙහිව අත්අඩංගුවට ගැනීමේ වරෙන්තුවක් නිකුත් කිරීම තුළින් ඔහුගේ පාර්ලිමේන්තු වරප්‍රසාද උල්ලංඝනය වී ඇති බවට විපක්ෂ නායක සජිත් ප්‍රේමදාස චෝදනා කරයි.

පොලිස් රාජකාරියට බාධා කිරීමේ සිද්ධියකට අදාළව අධිකරණයේ පවතින නඩුවකට පෙනීනොසිටීම හේතුවෙන් කොළඹ කොටුව මහේස්ත්‍රාත් අධිකරණය විසින් මන්ත්‍රීවරයාට එරෙහිව මෙම අත්අඩංගුවට ගැනීමේ වරෙන්තුව නිකුත් කර තිබිණි.

කෙසේවෙතත්, අදාළ නඩු වාරය කැඳවන අවස්ථාවේදී මන්ත්‍රීවරයා පාර්ලිමේන්තු සභා වාරයට සහභාගී වෙමින් සිටි බව වාර්තා වේ.

මේ පිළිබඳව පාර්ලිමේන්තුවේදී අදහස් දක්වමින් විපක්ෂ නායකවරයා පෙන්වාදුන්නේ, පාර්ලිමේන්තු කටයුතුවලට සහභාගී වීම ජනතාවගෙන් පත්වූ මන්ත්‍රීවරයෙකුගේ වරප්‍රසාදයක් බවත්, ජනතාවගේ නියෝජිතයෙකු ලෙස ඔහුගේ කර්තව්‍යයන් ඉටුකිරීමට බාධා නොකළ යුතු බවත්ය.

පාර්ලිමේන්තු මන්ත්‍රීවරයෙකුට සිය පාර්ලිමේන්තු වගකීම් ඉටුකිරීමට කිසිදු ආයතනයකින් බාධා නොවිය යුතු බව පැවසූ සජිත් ප්‍රේමදාස, මෙම සිදුවීම අර්චුනා මන්ත්‍රීවරයාගේ පමණක් නොව සමස්ත පාර්ලිමේන්තුවේම වරප්‍රසාද උල්ලංඝනය වීමක් බව අවධාරණය කළේය.

“මන්ත්‍රී අර්චුනාගේ වරප්‍රසාද කඩවී තිබෙනවා. ඔහුගේ අයිතිවාසිකම් ආරක්ෂා කිරීම කථානායකවරයාගේ වගකීමක්” යනුවෙන් පැවසූ විපක්ෂ නායකවරයා, මේ සම්බන්ධයෙන් වහාම තීරණයක් ගන්නා ලෙස කථානායක ජගත් වික්‍රමරත්නගෙන් ඉල්ලා සිටියේය.