July 23, 2026
රජය විසින්, ජනාධිපති මන්දිරය සහ හිටපු අමාත්යවරුන් සඳහා වෙන්කර තිබූ නිල බංගලා නිවාස නිල නිවාස ලෙස භාවිත නොකර, ජනතා සහ වාණිජ කටයුතු සඳහා යොදාගැනීමේ වැඩපිළිවෙළ ඉදිරියට ගෙන යන බව අග්රාමාත්ය හරිනි අමරසූරිය ඊයේ (23) පාර්ලිමේන්තුවේදී ප්රකාශ කළාය.
වර්තමාන රජයේ ප්රතිපත්තිය වන්නේ ජනාධිපති මන්දිරය හෝ අමාත්යවරුන් සඳහා කළින් වෙන්කර තිබූ නිල බංගලා නිවාස භාවිත නොකිරීම බව ඇය සඳහන් කළාය.
එම දේපළ අබලන් වීම වළක්වා ගනිමින් නඩත්තු කිරීම සහ ඒවා වාණිජ හා වෙනත් මහජන ප්රයෝජන සඳහා පරිවර්තනය කිරීමේ විශේෂ වැඩසටහනක් මේ වන විට ක්රියාත්මක බවද අග්රාමාත්යවරිය පැවසුවාය.
අමාත්ය මණ්ඩලය විසින් පත්කළ කමිටුවක් ජනාධිපති මන්දිරය ඇතුළු එවැනි දේපළ වාණිජ කටයුතු හෝ වෙනත් මහජන භාවිතයන් සඳහා යොදාගැනීමට නිර්දේශ කර ඇති අතර, එම ක්රියාවලිය මේ වන විට ආරම්භ කර ඇති බවද ඇය සඳහන් කළාය.
තවද, හිටපු අමාත්ය නිල බංගලා කිහිපයක් මේ වන විට අධිකරණ කටයුතු සඳහා යොදාගෙන ඇති බවත්, එම ගොඩනැගිලිවල අධිකරණ නඩු විභාග පැවැත්වීම මගින් අධිකරණ පද්ධතියේ කාර්යක්ෂමතාව ඉහළ නැංවීමට කටයුතු කර ඇති බවත් අගමැතිවරිය පැවසුවාය.
සමාජ මාධ්ය ඔස්සේ සංසරණය වන ප්රකාශවලට ප්රතිචාර දක්වමින් ඇය අවධාරණය කළේ, වත්මන් ආණ්ඩුවේ කිසිදු අමාත්යවරයෙකු නිල බංගලා නිවාසවල පදිංචි නොවන බවයි.
ඇය පැවසුවේ වත්මන් අමාත්ය මණ්ඩලයේ කිසිදු සාමාජිකයකු නිල නිවාසවල ජීවත් නොවන අතර, ඇතැම් අමාත්යවරු මාදිවෙල මන්ත්රී නිවාස සංකීර්ණයේ නවාතැන් ගෙන සිටින බවයි.
ආණ්ඩුව ජනතාවට ලබාදුන් පොරොන්දු සැලසුම් කළ ආකාරයට ක්රියාත්මක කරමින් සිටින බවද අග්රාමාත්යවරිය පැවසූ අතර, පාර්ලිමේන්තුවේ කරුණු මතුකිරීමේදී සමාජ මාධ්යවල සංසරණය වන තහවුරු නොකළ තොරතුරු මත විශ්වාසය නොතබන ලෙසද මන්ත්රීවරුන්ගෙන් ඉල්ලා සිටියාය.
