2026 පාපන්දු ලෝක කුසලාන තරගාවලිය නිමාවෙද්දී ලෝක පාපන්දු ඉතිහාසය අලුත් කරමින් පිට පිටම දෙවැනි වරටත් ලෝක කුසලාන තරගාවලියක වැඩිම ගෝල ලාභියාට හිමි ‘Golden Boot’ සම්මානය දිනාගැනීමට ප්‍රංශයේ කිලියන් ම්බාපේ සමත් විය. ලෝක ශූරතාවය දිනූ ස්පාඤ්ඤ කණ්ඩායමේ නායක රොඩ්රි තරගාවලියේ හොඳම ක්‍රීඩකයාට හිමි ‘Golden Ball’ සම්මානයෙන් පිදුම් ලැබීය.

27 හැවිරිදි ම්බාපේ මෙවර තරගාවලියේ තරග 8 කදී ගෝල 10 ක් වාර්තා කරමින් ලයනල් මෙසී අභිබවා මෙම සම්මානය දිනාගත්තේය. 1970 වසරේදී බටහිර ජර්මනියේ ගර්ඩ් මුලර්ගෙන් පසුව ලෝක කුසලාන තරගාවලියකදී ගෝල 10 සීමාව පසුකළ පළමු ක්‍රීඩකයා වන්නේද ඔහුය. මෙම සුවිශේෂී දක්ෂතාවයත් සමඟ ම්බාපේ සමස්ත ලෝක කුසලාන ඉතිහාසයේ වැඩිම ගෝල ලාභියා (ගෝල 22) බවට පත් වූයේ ලයනල් මෙසී (ගෝල 21) දෙවැනි ස්ථානයට ඇදදමමිනි.

තෙවැනි ස්ථානය සඳහා පැවැති තරගයේදී එංගලන්තය හමුවේ ප්‍රංශය 6-4 ක් ලෙස පරාජය වී සිව්වන ස්ථානයට පත්වුවද, ම්බාපේ එම තරගයේදී ගෝල 2 ක් වාර්තා කළේය. සම්මානය පිළිබඳව අදහස් දක්වමින් ඔහු කියාසිටියේ මෙවැනි සම්මානයක් තමන්ගේ අනාගතයට වැදගත් වුවද, රන් සපත්තුව දිනාගැනීමට වඩා අවසන් මහා තරගයේ ක්‍රීඩා කිරීමට ලැබුණේ නම් තමන් වඩාත් සතුටු වන බවයි.

නව ලෝක ශූරයන් වූ ස්පාඤ්ඤ කණ්ඩායම තරගාවලියේ සෙසු ප්‍රධාන සම්මාන සියල්ලම පාහේ තමන් සතුකර ගැනීමට සමත් විය. ස්පාඤ්ඤය දෙවැනි වරටත් ලෝක ශූරතාව කරා මෙහෙයවූ මැන්චෙස්ටර් සිටි කණ්ඩායමේ 30 හැවිරිදි මැදපෙළ ක්‍රීඩක රොඩ්රි, තරගාවලියේ විශිෂ්ටතම ක්‍රීඩකයා ලෙස ප්‍රකාශයට පත්කෙරිණි. ඔහු මෙයට පෙර 2023 වසරේ ‘Ballon d’Or’ සම්මානය සහ යුරෝ 2024 තරගාවලියේ දක්ෂතම ක්‍රීඩකයා සම්මානය ද දිනාගෙන තිබිණි.

මෙවර තරගාවලියේ වැඩිම ගෝලලාභීන් අතර එංගලන්තයේ ජූඩ් බෙලින්හැම් සහ නෝර්වේ හි අර්ලින් හාර්ලන්ඩ් ගෝල 7 බැගින් ලබාගත් අතර, උස්මාන් ඩෙම්බේලේ සහ හැරී කේන් ගෝල 6 බැගින් ලබාගත්හ.

ස්පාඤ්ඤ කණ්ඩායමේ ආරක්ෂක පෙළ මෙවර තරගාවලිය පුරා දැක්වූයේ අතිවිශිෂ්ට දක්ෂතාවයකි. තරගාවලියේ තරග 8කදීම ප්‍රතිවාදීන්ට තමන්ට එරෙහිව එකම එක ගෝලයක් පමණක් ලබාදීමට කටයුතු කළ ස්පාඤ්ඤ දැල් රකින්නා වන උනායි සිමොන් හොඳම දැල් රකින්නාට හිමි ‘Golden Glove’ සම්මානය දිනාගත්තේය. ඔහු තරග 7 කදීම කිසිදු ගෝලයක් වාර්තා වීමට නොදී තම දැල ආරක්ෂා කරගත් අතර, ඔහු පරාජය කිරීමට සමත් වූයේ අර්ධ අවසන් පූර්ව තරගයේදී බෙල්ජියමේ චාල්ස් ඩි කෙටෙලෙයර් පමණි.

එසේම, තරගාවලියේ හොඳම නැගීඑන තරුණ ක්‍රීඩකයාට හිමි සම්මානය දිනාගනු ලැබුවේ ස්පාඤ්ඤයේ 19 හැවිරිදි පාවු කුබාර්සි විසිනි. ස්පාඤ්ඤය වෙනුවෙන් තරගාවලියේ සෑම මිනිත්තුවක්ම ක්‍රීඩා කළ කුබාර්සි, 2010 වසරේ දකුණු අප්‍රිකාවේදී ස්පාඤ්ඤය ලැබූ ලෝක කුසලාන ජයග්‍රහණය යළිත් වරක් සිහිගැන්වීමට ප්‍රධානතම දායකත්වයක් සපයන ලදී.