ලංකා ප්‍රිමියර් ලීග් (LPL) 2026 තරගාවලියට අදාළව ක්‍රීඩකයෙකුට තරග පාවාදීම සඳහා බලපෑම් කළ බවට චෝදනා ලැබූ Jaffna Kings කණ්ඩායමේ හිමිකරුවකු වන, හිටපු ඉන්දීය වයස අවුරුදු 19න් පහළ ලෝක කුසලාන ජයග්‍රාහී ක්‍රිකට් ක්‍රීඩක මනජොත් කල්රා පොලීසිය විසින් අත්අඩංගුවට ගෙන තිබේ.

ක්‍රීඩා ක්ෂේත්‍රයට අදාළ වැරදි වැළැක්වීමේ පොලිස් විශේෂ විමර්ශන ඒකකය විසින් මෙම අත්අඩංගුවට ගැනීම සිදුකර ඇත්තේ 2026 LPL තරගාවලියේ සමාරම්භක තරගයට පැය කිහිපයකට පෙර බ්‍රහස්පතින්දා රාත්‍රියේදීය.

පොලීසිය සඳහන් කරන ආකාරයට, මනජොත් කල්රා කොළඹ පිහිටි තරු පහේ හෝටලයකදී ක්‍රීඩකයකු හමුවී තරගයක ප්‍රතිඵලය වෙනස් කිරීම සඳහා රුපියල් මිලියන 9.5ක (ඇමරිකානු ඩොලර් 28,700කට ආසන්න) මුදලක් ලබා දීමට උත්සාහ කරමින් සිටියදී මෙලෙස අත්අඩංගුවට පත්ව ඇත.

මෙම තරග පාවාදීමේ ප්‍රවේශය පිළිබඳව අදාළ ක්‍රීඩකයා විසින් මීට දින 10කට පමණ පෙර ප්‍රථම වරට බලධාරීන්ට වාර්තා කර ඇති අතර, ඒ ඔස්සේ සිදුකළ දීර්ඝ විමර්ශනයකින් පසුව මෙම වැටලීම සිදු කර තිබේ. සැකකාර කල්රාව කොළඹ මහෙස්ත්‍රාත් අධිකරණය වෙත ඉදිරිපත් කිරීමට නියමිතය.

2026 LPL තරගාවලිය ආරම්භ වීමට පෙර යාපනය කිංග්ස් කණ්ඩායමේ හිමිකාරිත්වයේ කොටස්කරුවකු ලෙස මනජොත් කල්රා නිල වශයෙන් ප්‍රකාශයට පත් කර තිබිණි. ඔහු 2018 වසරේදී ප්‍රිත්වි ෂෝ (නායක), ශුබ්මන් ගිල්, අර්ෂ්දීප් සිං සහ ශිවම් මාවි වැනි වර්තමාන ඉන්දීය ජාතික ක්‍රිකට් තරු සමඟ 19න් පහළ ලෝක කුසලාන දිනූ ඉන්දීය සංචිතයේ ප්‍රබල සාමාජිකයෙකි. එම ලෝක කුසලාන අවසන් මහා තරගයේදී ඕස්ට්‍රේලියාවට එරෙහිව නොදැවී ශතකයක් රැස්කරමින් ඉන්දියාවට ලෝක කුසලානය දිනා දීමට ඔහු ප්‍රධානතම කාර්යභාරයක් ඉටුකළේය.

මෙම අත්අඩංගුවට ගැනීම සිදුවුවද, 2026 ලංකා ප්‍රිමියර් ලීග් තරගාවලිය සැලසුම් කළ පරිදිම අද (17) සන්ද්‍යාවේ කොළඹ SSC ක්‍රීඩාංගණයේදී ආරම්භ වන බව ශ්‍රී ලංකා ක්‍රිකට් ආයතනය තහවුරු කරයි.

ශ්‍රී ලංකා ක්‍රිකට් ආයතනය පවසන්නේ විමර්ශන සඳහා පොලිස් විශේෂ විමර්ශන ඒකකයට අවශ්‍ය සියලුම සහාය ලබා දෙන බවයි. ක්‍රීඩාවේ දූෂණ, අනිසි හැසිරීම් සහ සදාචාර විරෝධී ක්‍රියාවන් සම්බන්ධයෙන් තමන් දැඩි ‘ශුන්‍ය ඉවසීමේ’ ප්‍රතිපත්තියක් අනුගමනය කරන බවත්, ලීගයට සම්බන්ධ කිසිදු පාර්ශවයක අක්‍රමිකතාවක් ඉවසන්නේ නැති බවත් ක්‍රිකට් ආයතනය අවධාරණය කරයි.

තරගාවලියේ විනිවිදභාවය රැකගැනීම සඳහා ක්‍රිකට් දූෂණ මර්දන ඒකකය පොලීසිය සමඟ එක්ව වැඩ කරන අතර, ‘Integrity Mentors’ නමැති ස්වාධීන ක්‍රීඩා අඛණ්ඩතා සංවිධානයේ විශේෂඥ සහාය ද මේ සඳහා ලබාගෙන තිබේ.

ශ්‍රී ලංකාවේ 2019 අංක 24 දරන ක්‍රීඩාවලට අදාළ වැරදි වැළැක්වීමේ පනත යටතේ තරග පාවාදීම, ස්ථානීය පාවාදීම සහ අල්ලස් දීම සම්බන්ධයෙන් ලොව පවතින දැඩිම දඬුවම් ක්‍රියාත්මක වේ. මීට මාස කිහිපයකට පෙර දඹුල්ල තන්ඩර්ස් කණ්ඩායමේ හිමිකරු වූ තමීම් රහමන් ද ක්‍රීඩකයින්ට බලපෑම් කිරීමේ චෝදනා මත වරදකරු වී වසර 5කට අත්හිටුවූ වසර 4ක සිරදඬුවමකට සහ රුපියල් මිලියන 24ක දඩයකට යටත් විය.

පොලිසිය සඳහන් කරන්නේ වත්මන් සිදුවීමට අදාළ විමර්ශන කටයුතු තවදුරටත් අඛණ්ඩව ක්‍රියාත්මක වන බවයි.