ශ්‍රී ලංකාව තුළ අලෙවි කරනු ලබන සියලුම සකසන ලද දියර කිරි සඳහා බලපැවැත්වෙන පරිදි, උපරිම අවසර ලත් ඇෆ්ලටොක්සින් සීමාවන් ඇතුළත් නව රෙගුලාසියක් පාරිභෝගික කටයුතු පිළිබඳ අධිකාරිය හඳුන්වා දී තිබේ. මෙම නව නියෝගය 2027 ජනවාරි 8 වැනිදා සිට ක්‍රියාත්මක වීමට නියමිතය.

2003 අංක 9 දරන පාරිභෝගික කටයුතු පිළිබඳ අධිකාරී පනතේ 12(2) වගන්තිය යටතේ නිකුත් කරන ලද මෙම විධානය, අතිවිශේෂ ගැසට් පත්‍රයක් මඟින් ප්‍රකාශයට පත්කර ඇත.

මෙම නව නීතියට අනුව, නියමිත ඇෆ්ලටොක්සින් සීමාව ඉක්මවා යන සකසන ලද දියර කිරි නිෂ්පාදනය කිරීම, ආනයනය කිරීම, විකිණීම හෝ බෙදාහැරීම සපුරා තහනම් වේ. මෙම තහනම:

* නිෂ්පාදකයන්
* ආනයනකරුවන්
* ඇසුරුම්කරුවන් සහ සැපයුම්කරුවන්
* ගබඩා අයිතිකරුවන්, බෙදාහරින්නන් සහ ප්‍රවාහනකරුවන්
* සිල්ලර හා තොග වෙළෙඳුන් ඇතුළු සමස්ත සැපයුම් දාමයටම එක ලෙස බලපැවැත්වේ.

ගැසට් නිවේදනයට අනුව, සකසන ලද දියර කිරිවල අඩංගු විය හැකි උපරිම ඇෆ්ලටොක්සින් ප්‍රමාණය කිලෝග්‍රෑමයකට මයික්‍රෝග්‍රෑම් 0.5ක් (0.5 µg/kg හෙවත් ppb) නොඉක්මවිය යුතුය. මෙම සීමාව ශ්‍රී ලංකා ප්‍රමිති ආයතනය (SLSI) විසින් නිකුත් කර ඇති *SLS 1815* ශ්‍රී ලංකා ප්‍රමිතියට අනුකූල වේ.

පාරිභෝගික කටයුතු පිළිබඳ අධිකාරිය අවධාරණය කරන්නේ 2027 ජනවාරි 8 වැනිදා සිට මෙම රෙගුලාසිය බලාත්මක වන බැවින්, දියර කිරි සැපයුම් දාමයේ සිටින සියලුම පාර්ශවයන් මෙම නියමිත ප්‍රමිතීන්ට අනුකූල වීම අනිවාර්ය වන බවයි.

පාරිභෝගික කටයුතු පිළිබඳ අධිකාරියේ නියෝගය පරිදි නිකුත් කර ඇති මෙම නිවේදනය සඳහා එහි සභාපති එස්. එම්. ඩී. සූරියකුමාර අත්සන් තබා ඇත.