ගෝලීය වශයෙන් ඇමෙරිකා එක්සත් ජනපදය කෙරෙහි පවතින සුහදශීලී ආකල්පය කැපී පෙනෙන ලෙස පහත වැටී ඇති අතර, ලොව පුරා සිදුකළ නවතම මත විමසුමකට අනුව රටවල් බහුතරයක ජනතාව ඇමෙරිකාවට වඩා චීනය කෙරෙහි පැහැදීමකින් පසුවන බව හෙළි වී තිබේ.

ලෝක ප්‍රකට ‘පිව් පර්යේෂණ මධ්‍යස්ථානය’ (Pew Research Center) විසින් 2026 පෙබරවාරි සහ මැයි මාස අතර කාලය තුළ රටවල් 36 ක වැඩිහිටියන් 42,000 කට අධික පිරිසක් ඇසුරින් මෙම සමීක්ෂණය පවත්වා ඇත.

එහි ප්‍රතිඵලවලට අනුව ජනාධිපති ඩොනල්ඩ් ට්‍රම්ප්ගේ දෙවන නිල කාලය තුළ ඇමෙරිකානු නායකත්වය කෙරෙහි පැවති ජාත්‍යන්තර විශ්වාසය බිඳ වැටී ඇති අතර, චීනය සහ එහි නායක ෂී ජින්පින් කෙරෙහි පවතින පැහැදීම ක්‍රමයෙන් ඉහළ ගොස් තිබේ.

පසුගිය වසරේ ඩොනල්ඩ් ට්‍රම්ප්ගේ දෙවන ධුර කාලය ආරම්භ වීමත් සමඟ ඇමෙරිකාව කෙරෙහි වූ ගෝලීය ප්‍රසාදය අඩු වීමට පටන් ගත්තද, එම අවධියේදී ලෝකයේ වැඩි පිරිසක් චීනයට වඩා ඇමෙරිකාවට ලැදි බවක් දැක්වූහ. එහෙත් මේ වසර වන විට තත්ත්වය සම්පූර්ණයෙන්ම වෙනස් වී ඇත.

පසුගිය වසර කිහිපය තුළ චීනය කෙරෙහි ධනාත්මක ආකල්ප වර්ධනය වෙද්දී ඇමෙරිකාව කෙරෙහි වූ ප්‍රසාදය කෙමෙන් ගිලිහී ගියේය. එහි ප්‍රතිඵලයක් ලෙස, සමීක්ෂණයට ලක් කළ රටවල් 36 න් බහුතරයක මේ වන විට ඇමෙරිකාවට වඩා චීනය කෙරෙහි යහපත් ආකල්පයක් ගොඩනැඟී තිබේ.

ලෝක දේශපාලන කටයුතුවලදී නිවැරදි තීරණ ගැනීම සම්බන්ධයෙන් මෙම රටවල් දෙකේ නායකයන් කෙරෙහි පවතින ජනතා විශ්වාසයද මෙලෙසම වෙනස් වී ඇත.

ජෝ බයිඩන් ජනාධිපතිවරයා ලෙස කටයුතු කළ අවසන් සමයේදී, චීන ජනාධිපති ෂී ජින්පින්ට වඩා බයිඩන් කෙරෙහි වැඩි විශ්වාසයක් ලෝක ජනතාව තුළ පැවතියද, 2023 සිට 2024 දක්වා කාලය තුළ බොහෝ රටවල බයිඩන්ට තිබූ ජනප්‍රියත්වය අඩු විය.

විශේෂයෙන්ම ඩොනල්ඩ් ට්‍රම්ප්ගේ දෙවන ධුර කාලයේ පළමු වසර දෙක තුළ ඇමෙරිකානු ජනාධිපතිවරයා කෙරෙහි පැවති ගෝලීය පිළිගැනීම බරපතළ ලෙස පහත වැටී ඇත.

තවමත් ලෝකයේ සැලකිය යුතු පිරිසක් ෂී ජින්පින් කෙරෙහි පූර්ණ විශ්වාසයක් නොදැක්වුවද, ඔහු කෙරෙහි ඇති ධනාත්මක ආකල්ප ලොව පුරා සීඝ්‍රයෙන් ව්‍යාප්ත වෙමින් පවතී.

ඒ අනුව, වත්මන් ගෝලීය තත්ත්වය තුළ ඩොනල්ඩ් ට්‍රම්ප්ට වඩා චීන ජනාධිපති ෂී ජින්පින් කෙරෙහි ජාත්‍යන්තර ප්‍රජාව වැඩි විශ්වාසයක් තබා ඇති බව මෙම සමීක්ෂණයෙන් තහවුරු වේ.