එක්සත් ජනපදය විසින් එල්ල කරන ලද ප්‍රහාරවලට ප්‍රතිචාර වශයෙන් ඉරානය විසින් ගල්ෆ් කලාපයේ රටවල් වෙත එල්ල කරන ප්‍රහාර තවදුරටත් පුළුල් කිරීමත් සමඟ, හෝමුස් සමුද්‍ර සන්ධිය හරහා සිදුවන ගෝලීය බලශක්ති සැපයුමට එල්ල වී ඇති දැඩි තර්ජන හේතුවෙන් ලෝක වෙළඳපොළේ බොරතෙල් මිල ගණන් සඳුදා දිනයේදී වේගයෙන් ඉහළ ගොස් තිබේ.

මේ අනුව බ්‍රෙන්ට් බොරතෙල් මිල ඩොලර් 2.34කින් හෙවත් 3.08%කින් ඉහළ ගොස් බැරලයක් ඩොලර් 78.35ක් වූ අතර, ඇමරිකානු ඩබ්ලිව්.ටී.අයි. (WTI) බොරතෙල් මිල ඩොලර් 2.21කින් හෙවත් 3.09%කින් ඉහළ ගොස් බැරලයක් ඩොලර් 73.62ක් දක්වා ඉහළ ගොස් තිබේ.

පසුගිය සති අන්තයේදී ටෙහෙරාන් පාලනය විසින් කටාර් රාජ්‍යය සහ එක්සත් අරාබි එමීර් රාජ්‍යය වෙත එල්ල කරන ප්‍රහාර පුළුල් කිරීමට පියවර ගත් අතර, ඊට ප්‍රතිචාර ලෙස එක්සත් ජනපදය ද ඉරානය ඉලක්ක කර ගනිමින් තවදුරටත් ප්‍රහාර දියත් කළේය.

මෙය හෝමුස් සමුද්‍ර සන්ධියේ නාවික ගමනාගමනය කේන්ද්‍ර කරගනිමින් දෙපාර්ශවය අතර අඛණ්ඩව සිදුවන ප්‍රහාර සහ ප්‍රති-ප්‍රහාර මාලාවක නවතම වර්ධනයයි.

අනුමත නොකළ මුහුදු මාර්ගයක ගමන් කළ නෞකාවකට ප්‍රහාර එල්ල වීමෙන් පසු සමුද්‍ර සන්ධිය වසා දැමීමට ඉරානය පියවර ගත් බව මීට පෙර ප්‍රකාශ කර තිබුණ ද, ඇමරිකානු ජනාධිපති ඩොනල්ඩ් ට්‍රම්ප් ඉරිදා දිනයේදී අවධාරණය කළේ හෝමුස් සමුද්‍ර සන්ධිය වාණිජ නෞකා ගමනාගමනය සඳහා විවෘතව පවතින බවයි.

කෙසේ වෙතත්, Kpler සමාගමේ නෞකා නිරීක්ෂණ දත්තවලට අනුව ඉරිදා දිනයේදී එම සමුද්‍ර සන්ධිය හරහා ගමන් කර ඇත්තේ නෞකා හයක් පමණක් වන අතර, එය පසුගිය සති පහක කාලය තුළ වාර්තා වූ අවම අගය වේ.

මෙලෙස උග්‍ර වන යුධමය තත්ත්වය හේතුවෙන්, හෝමුස් සමුද්‍ර සන්ධිය නැවත විවෘත කිරීම සහ දින 60ක සාකච්ඡා වටයකින් පසු යුද්ධය අවසන් කිරීම අරමුණු කරගනිමින් පසුගිය මාසයේදී එක්සත් ජනපදය සහ ඉරානය අතර අත්සන් කරන ලද අන්තර්කාලීන ගිවිසුමේ අනාගතය පිළිබඳ දැඩි සැකමතු වී තිබේ.

ජාත්‍යන්තර බලශක්ති ඒජන්සිය සිකුරාදා නිකුත් කළ මාසික වාර්තාවට අනුව, මෙම එකඟතාවයෙන් පසු ජූනි මාසයේදී ගෝලීය තෙල් සැපයුම දිනකට බැරල් මිලියන 4.1කින් ඉහළ ගියද, එය තවමත් යුද පූර්ව වටපිටාවට වඩා දිනකට බැරල් මිලියන 9.4ක අඩුවීමකි.

මේ අතර ANZ බැංකුවේ විශ්ලේෂකයන් පෙන්වා දෙන්නේ සති අන්තයේ හටගත් නොසන්සුන්තා හමුවේ මෙම ගැටුම්වලට කඩිනම් විසඳුමක් ලැබෙනු ඇතැයි පැවති බලාපොරොත්තු බිඳ වැටී ඇති බවයි.